Naam
Nebbiolo
Beskrywing
Nebbiolo is ’n rooiwyn variëteit wat geassosieer word met van die wêreld se beste verouderde wyne. Die naam kom blykbaar van die Italiaanse woord ‘nebula’ wat mis beteken. Dit kan wees omdat die druif vroeg in die herfs ryp word as dit begin mistig word in Italië.
’n Ander rede hiervoor kan wees dat die naam verwys na die wit mistige lagie wat op die korrels verskyn sodra dit ryp word. Nebbiolo kan moontlik van die ander Italiaanse variëteit Freisa kom of verwant wees aan Viognier.
Oorsprong
Volgens DNA analise kom Nebbiolo van Piedmont of die Valtellina area in noordwes Italië. Dit is een van die oudste variëteite wat in Italië groei en is al in die 13de eeu in die Staatsargiewe van Torino opgeteken. Daar word beweer dat Nebbiolo die Spiona variëteit is waarna Plinius die ouere in AD 1 in sy boek Naturalis Historiae verwys.
Piedmont het oor die jare ’n reputasie opgebou vir sy Barolo en Barbaresco wyne, wat uitsluitlik gemaak is van Nebbiolo-druiwe wat in sekere dorpe in die streek groei.
Gedurende die 15de eeu was Nebbiolo so hoog aangeslaan in die Barolo gebied (toe bekend as La Morra) dat jy gehang of jou regterhand afgekap kon word as jy een van die wingerdstokke beskadig of afsny.
In Italië is daar oor die jare na Barolo en Barbaresco verwys as ‘die wyn van die konings en die koning van wyne’. In die verlede is die wyne te vroeg gedrink, maar ’n goeie Barolo wyn moet vir ten minste twaalf jaar verouder word om sy volle potensiaal te bereik. Dit is ’n baie moeilike wyn om te produseer.
Sommige mense is van die opinie dat Nebbiolo-produksie slegs deur wynmakers gepoog moet word, wat die kuns van die net so uitdagende Pinot Noir bemeester het.