Tradisioneel is kooigoed gebruik om voorouers op te roep, negatiewe energie uit kamers te neutraliseer of siekekamers te berook. Aangesien dit insekte afweer, is dit as beddegoed gebruik en dit help teen slaaploosheid. (Vandaar die verwysing na ‘kooigoed’.) Daar word beweer dat helichrysum olie spanning en hoofpyn verlig en gebruik kan word om hoes, verkoue en koors te behandel. Dit het kragtige antibakteriese en antivirale eienskappe, wat dit noodsaaklik in ’n noodhulpkissie maak om insekbyte en selfs spinnekop, skerpioen en slangbyte te behandel.
Helichrysum olie het anti-inflammatoriese eienskappe en is ideaal vir tendonitis, weefselpyn en rumatiek. Dit is ook antifungaal en antisepties en as gevolg van die vernuwende eienskappe kan dit help om littekens, dermatitis en aknee te genees. Die teen-veroudering eienskappe stimuleer sel verjonging, wat dit ’n ideale bestanddeel in velroom en sonskerms maak. As dit ingeasem word verlig dit brongiale kongestie en in aromaterapie help dit teen allergiese reaksies. Dit kan stres verlig en die senuweestelsel versterk.
Helichrysum groei van saad of steggies. Die klimaat bepaal die opbrengs. As die plante genoeg water kry kan dit twee keer per jaar geoes word - in die lente en weer in die herfs. Die blare, stingels en blomme word droog of vars gebruik en met stoomdistillasie word ’n liggeel en dun, byna waterige olie verkry. Die reuk is taamlik skerp, aards en kruidagtig. Helichrysum word in Clocolan in die Vrystaat wild geoes en gekweek. Dit groei ook noord van Gauteng, Baviaanskloof in die Oos-Kaap, Stellenbosch en Piketberg in die Wes-Kaap.