Ngokolwazi lwemithi yomdabu yase-Afrika neyaseNdiya (ulwazi lwe-Ayurvedic) umoringa unezithako eziwu-540 ezingelapha noma zivimbe izifo eziwu-300. Isisetshenziswe emazweni aseMpumalanga, isetshenziselwa izifo ezinjengesifo sikashukela, isifo senhliziyo, i-anemia, i-arthritis, isifo sesibindi, kanye nezinkinga zokuphefumula, ezesikhumba nezokugayeka kokudla, manje umoringa uthathwa ‘njengokudla-ngqangi’. Impushana yamaqabunga, izimpande, ixolo nemidumba eluhlaza egayiwe isetshenziselwa umsoco, ukuqeda ukuluma, ukuhlumelelisa igazi nokuvikela izicubu.
UMoringa ungumthombo wamavitamin, amamineral, kanjalo nama-amino acid amqoka, okuwenza ubeyiprotein eliphelele. Uqukethe amanani amakhulu kavitamin C, E, ipotassium (K), insimbi (Fe) nezinc (Zn). Ngaphezu kwalokhu amacembe emoringa angumthombo oqavile wecalcium (Ca) futhi uqukethe uvitamin A (ibeta carotene), ophindwe ngokulishumi kunezanqanti. Impushana yemoringa ingasetshenziswa esikhundleni samaphilisi e-iron, yingakho uyikhambi le-anemia. Inyama ino-2mg womsoco wensimbi ekubeni impushana yeqabunga lemoringa lino-28mg womsoco wensimbi.
KwelaseNdiya, amaqabunga omoringa asetshenziselwa ukwehlisa ubisi kubadlezane futhi uvame ukufakwa esojeni lamalentili ngenkathi yemikhuhlane ukuze iyivimbe. Amacembe, inhlaka, izimpande, izimbali nembewu kusetshenzisiwe ukugcina ukuthamba kwezicubu, izifo zenhliziyo nesibindi, nokuzinzisa ushukela egazini necholesterol. Futhi yenza nemisebenzi engqala yokulwa namagciwane kanye ne-TB.
Emazweni athuthukayo, umoringa usetshenziswa ngokuvamile njengekhambi lokwelapha, kungafani nemiphakathi yase-Asia yona ewusebenzisa njengokudla. Ivame ukuthathwa ngabantu abangenwe isandulela-ngculaza ukuqinisa amasotsha omzimba nokulawula izifo ezingosomathuba. Ukuthi umoringa utshaleka kalula lokho kwenza ukuthi ubeyikhambi eliyinala lokwelapha indlala-amazwe anjengoSenegal noBenin alapha izingane ngomoringa.
Imikhiqizo yomoringa iklela kusukela eqabungeni, impushana namaphilisi kuya kumkhuxuzo wamaprotein, amafutha ezinhlamvu, izimbiza nezichonco.
Amaqabunga angavunwa ngokunquma isimila phezulu uma sesikhule saba ngu-1 m, ushiye u-30cm. Sitshaleka kalula ngembewu, kodwa sidinga umanyolo wenitrogen ukuze uthele kahle. Ithanda izinga lokushisa elingu-25 kuya ku-30 ºC nomhlaba osendimeni, ongenamanzi, kodwa ungakhula kahle nasenhlabathini eyisidongo.