Tlhagiso ya Lefatshe
Monamune ke nngwe ya mefuta ya leungo e e rategang thata le go tlhagiswa ka go anama lefatshe ka bophara. Monamune o tlhagisiwa mo dikgaolong tsa jalô mo dikontinenteng tsotlhe ntle le Antarctica. E ka nna tharo-nneng ya tlhagiso ya monamune ya lefatshe e e tlhagisiwa kwa Sephatlo-fatshe sa Bokone. Bontsi jwa leungo leno le tlhagisiwa kwa USA le go dikologa Mediterranean, fela, naga e e leng motlhagisi mogolo wa monamune mo lefatsheng ke Brazil.
Tlhagiso ya Afrika Borwa
Fa go lebeletswe dielo tsa tlhagiso, monamune ke bodirelo jwa maungo jo bo golo mo Afrika Borwa, mme ka bogolo bo totile mmaraka wa thomelo-ntle. Bodirelo jwa monamune jwa Afrika Borwa ke moromela-ntle yo mogolo mo Sephatlo-fatsheng sa Borwa mme bo na le seabe mo go feteng 60% ya thomelo-ntle ya monamune mo Sephatlo-fatsheng sa Borwa. Afrika Borwa ke moromela-ntle wa monamune wa bobedi ka bogolo, morago ga Spain.
Kgaolo ya Tlhagiso
Mefuta ya monamune e tlhagisiwa mo dikgaolong tsa bosa tse di farologaneng go ralala Afrika Borwa mme ditlhagiso di atologile ka lobelo go ralala naga. Dikgaolo-kgolo tsa tlhagiso di kwa Kapa Bophirima, Kapa Botlhaba, go ikala Noka ya Orange kwa Kapa Bokone, KwaZulu-Natal Midlands, Mpumalanga Botlhaba le Limpopo.
Setlha
Setlha sa monamune sa Afrika Borwa se simolola ka Tlhakole ka diratsuru mme se tswelela go fitlha ka Lwetse fa dinamune tsa bofelo di kotulwa.
Dithekiso
Monamune wa Afrika Borwa o rekiswa selegae mo Afrika Borwa le go romelwa-ntle kwa dinageng tsa boagisani. Monamune gape o romelwa-ntle kwa Yuropa le UK, Yuropa Botlhaba, Botlhaba-Gare ga mmogo le Asia le Amerika Bokone.
Ditiriso
Maungo a monamune a na le dikotla tse di kwa godimo. Leungo le a jega mme dithapo le matlapi gantsi di a latlhwa. Zest, eleng boalô jo bo kwa ntle jwa letlapi, e dirisetswa go tsenya tatsô mo dijong le dinong. Ntle le go ja leungo, monamune gape o a gamolwa go dira dinomatute. Gape leungo la monamune le matute a monamune di tsenngwa mo mmolopitong, di a omiswa le go gatsetswa. Digamolwa tsa monamune di dirisetswa melemo le ditlola-letlalo.
Translated by Nchema Rapoo