Dipatlisiso tsa bonetetshi ka ga oli ya L. javanica di supa gore motseletsele wa yona wa tsa molemô o akaretsa tswantsho-kankere, twantsho ya bolwetse jwa sukiri, twantsho-malaria, antimicrobial le ditlamorago tsa antioxidant. Matlhare, dithupana le medi di diriswa ke baXhosa mo merianeng ya setso (ba ba e bitsang ‘inzinziniba’) jaaka molemô-kakaretso o o nowang kgotsa, jaaka titielo e e bogale, go alafa mogotlhwane le ditshwaetsego tsa kgokgotso.
Go tshasa tee e e bogale jaaka setlôdi, go ka fodisa diso le mengapô le go alafa dinta le melongô. E diriswa mo medirong ya go tlhatswa sefifi fa mongwe a kile a tshwara setopo, go dumelwa gape fa e fana ka tshireletso kgatlhanong le dikwena, tladi le dintša. Fa e tswakantswe le Artemisia afra (Lengana), lippia e thusa go alafa letshoromo le le bakilweng ke mofikela, malaria le mmoko, mme e ka thibela tshwaetsegô ya mafatlha.
Go hemiwa mosi gotswa mo go fisweng ga dikutu, mme dikutu di ka tswa di dira sentle kgatlhanong le asthma le megotlholo e e tsayang sebaka. Mosi gape o koba menang, matlhare a a tšhwatlilweng fa a tlhakanngwa le metsi a diriswa go koba dikgofa, mme dithupana fa di diriswa jaaka boalo mo dikagông tsa thuonong di koba matsêtsê le motlhwa. Matlhare a tshaswa mo letlalong, go dikaganyetsa dikgoro tsa mannô kgotsa a latlhelwa mo molelong go koba menang.
“Imbiza,” eleng motswako o o tumileng o o dirwang gotswa mo L. javanica le Knysna lily, e diriswa ke baZulu jaaka setiisa masole a mmele mme gape le mo kalafong ya kankere, bolwetse jwa sukiri, matshwao a HIV/AIDS le TB. E humile ka oli e e mowafalang ka bonako, ka monkgo o o kareng wa ratsuru, e koba ditshenekegi le borotwe. E jalelwa kgwebo ya tlhagiso-oli e e botlhokwa mo Afrika Borwa, kerese ya sekoba-monang e e dirisang oli e e botlhokwa e tlhagisitswe ke CSIR goya ka kitso ya setso. Matlhare a na le masobana a oli mo matlhakoreng mme a fana ka monkgo o o bogale fa a forogotlhwa.
Matlhare le malomo a obolwa gotswa mo semeleng mme se gamolwe ka mosi wa metsi a a mogote go ntsha oli e e botlhokwa. Nako dingwe go thata go fitlhelela tatso e e tsepameng jaaka tatso ya yona e farologana gotswa go ratsuru, cinnamon, eucalyptus le mint mo mofuteng o le mongwe. Mo tirisong ya mo dikobeng-menang, batlhagisi gantsi ba tlhoka go fetofetola tatso ka go tsenya lemongrass kgotsa dioli tse dingwe tse di botlhokwa go fitlhelela monkgo o o nepagatseng wa sekobi.
Setlhare sa letshoromo se mela bonolo gotswa mo dipeong le mesegông. Ke segolela-bonako, se rata seêmô se se letsatsi mme se itumelela mofuta mongwe le mongwe wa mmu, nako dingwe o thopa dikarolo tse di lemilweng. E a lengwa ebile e kutulwa kwa nageng kwa diporofenseng tsa Mpumalanga le Limpopo.