Dihupametsi le Vygies tsa Richtersveld

Setlha se se Matlhare

©David Fleminger

Go na le matso a le mantsi a vygies kwa Namaqualand le Richtersveld, a a nang le seabe se se golo thata mo tshedisanong ya ditshedi ya kgaolo. Le fa di tlwaelegile jaana, di simolotse fela go tlhagelela mo dirêkhôteng tsa masalêla a ditshidi tsa bogologolo dingwaga di le 12000 tse di fetileng. Fela, seno e katswa ele ka ntlha ya gore ditikologo tsa sekaka ga di a siamela go tlhamô ya masalêla a ditshidi tsa bogologolo.
Vygies di hupametsi, ka disele tsa setlha se se kgethegileng mo matlhareng a tsona. Malomo a tsona le ona a phatsima thata, ebile a kganyisa, ka diphetale di le di ntsi.
Sethunya seno se se kgatlhang leitlho se bopetswe go ngoka ditshenekegi tse di dulafatsang.
Mesembs nako dingwe a bitswa ‘malomo a sethobokolo’ ka gonne gantsi a bula dithunya tsa ona fa letsatsi le phatsima thata. Matlhare a ona ga a na tatso mme ga a jewe jalo ke diphologolo tse di fulang kgotsa ditshenekegi.
Thaba ya Rosyntjieberg kwa Richtersveld National Park e na le palo e e kwa godimo ya matso a vygie.

Keletso ya Dikerese le Botoro

©Jaques Marais

Botterboom (Tylecodon paniculatus): E ranolwa jaaka ‘setlhare sa botoro’, seno ke sehupametsi se se khutshwane se le sepirigwana ka kutu e kima. Se fitlhelwa mo dikarolong di le di ntsi tsa Richtersveld Community Conservancy le kwa Richtersveld National Park.
Ghaap (Hoodia Gordonii): Hoodia e ntse e diriswa jaaka sekganedi sa keletso ya dijo ke Basarwa dingwaga di le makgolokgolo. Setswakwa se se dirang thata sa semela se tlhaotswe ke South African Council for Scientific and Industrial Research (CSIR). Ga jaana têtlêlêlô e neetswe dikhamphani tsa melemo tse di se rekisang jaaka pilisi ya mokgwa wa go ja. Ka 2002, CSIR e konoseditse ditherisano le baemedi ba Basarwa mme ga jaana e duela letlole go San Hoodia Benefit Sharing Trust ka ntlha ya kitso ya tlhago e e isitseng kwa go dirweng ga pilisi eno. Madi a ya kwa tlhabololong ya merafe ya Basarwa go ralala borwa jwa Afrika.
Kerese ya Mosarwa (Sarcocaulon patersonii). Semela seno se na le lekwati le le kima le le relelang go se sireletsa kgatlhanong le dithungthung. Lekwati le tuka bonolo, ka mosi o mo ntsi, mme seno se neetse semela leina la sona.

Letshwao la Richtersveld

©Shem Compion

Halfmens (Pachydodium namaquanum) e e gakgamatsang ke semela se se tshwantshitsweng go feta se se fetogileng letshwao la Richtersveld.
Ke sehupametsi sa kutu e kgolo, kgotsa setlhare sa sehupametsi, halfmens (e e rayang gore halofo ya motho) e e sa tlhaloganyeseng mme ele mo kotsing ya go nyelela, ke semela se se tshwanang le mokgwapha ka molomo wa matlhare mo godimo ga ‘tlhogo’ ya sona, mmogo le dikarolwana tse di kobegelang kwa ntle gotswa mo kutung e e fa gare. ‘Tlhogo’ ya semela e phela e kobegetse goya kwa bokone mme tshekamô enô e tlhaloswa ke leinane la bogologolo.
Dingwaga di le di ntsi tse di fetileng, go ne go na le morafe wa bontwadumela o o neng o tshela kwa bokone. Tsatsi lengwe, ka motsi wa ntwa, ba ne ba ntshwa gotswa mo lefatsheng la bona le go tabogisetswa go tlola Noka ya Orange, go tsena mo Richtersveld.
Fano, Modimo o ne a ba fetola ditshidi tse di makatsang; halofo ya motho, halofo ya semela. Ka dinao tsa bone tse di meletseng mo mmung, morafe o ne o gaeletswe mme, go fitlha ka tsatsi leno, ba santse ba eme kwa Richtersveld, ba lebile bokone ka metlha yotlhe, ba tlhwaafaletse legae la bona la maloba.
Ke kgang e e monate, fela bonnete ka ga dimela ga bo tlhabose. Kokoano e e mafura ya matlhare mo ‘tlhogong’ ya semela e tota ele motswedi wa sona wa maatla, o o hupang metsi le maatla a letsatsi. Ka jalo, se sekamela kwa bokone gore se dirise letsatsi ka botswerere.
Ka go golela kwa boleeleng jo bo fitlhang go 5 m, halfmens e gola thata ka dikgwedi tsa mariga, fa e tlhoga dithunya tse di matute tse di bopegileng jaaka terompeta.
Ka selemo, e tlhotlhorega matlhare mme e ikanye sekhumetsi se se kima se se mebitlwa go ka itshireletsa kgatlhanong le letsatsi le le fisang. Mebitlwa gape e e sireletsa kgatlhanong le diphologolo tse di fulang, mme e thuse gape mo go kokonyeng metsi a pula le bongola gotswa go malmokkies.
Halfmens e fitlhelwa fela kwa Richtersveld mme e sewelo thata. Ke tshwanetse go ipobola gore ka motsi wa ketelo ya me, ke reteletswe ke go e bona. Le fa gole jalo, ke nngwe ya dimela tse di tumeleng thata mo kgaolong. Tshika ya yona e e gaufi (P. lamerei) e fitlhelwa fela kwa Madagascar.

Translated by Nchema Rapoo