Ntle le oli ya mmoane (hemp) e sebediswang haholo difemeng jwaloka sesebediswa se omisang kahara pente, e le pente e bonaletsang ebile e le senolofatsi, semela sa mmoane (Cannabis sativa) se ka sebediswa e le pampiri, ho monya tjhefu mobung le ho ba mohlodi wa dibeso.
Mmoane e Le Pampiri
Tshebediso ya mmoane bakeng sa pampiri e ka latellwa ho ya dilemong tsa 200-150 pele ho Kreste ha China e ne e etswa ka ho bopa mmoane o entsweng mokedikedi ho etsa maqephe a masesanyane.
Mongwahakgolong wa 7, ho ile ha ahwa difeme tsa ho hlahisa pampiri Botjhabela Bohareng le China. Tshebediso ya mmoane e ile ya phatlalla nqa bophirima. Di-Bibele le dibuka tse balwang tsa bangodi ba kang Mark Twain di ile tsa hatiswa pampiring ya mmoane mme Russia mmoane o ile wa sebediswa ho hatisa tjhelete le ditempe.
Pampiri e ka hlahiswa ka kgwele e telele e tswang kahara kutu kapa ka kgwele e kgutshwanyane ya mokedikedi. Pampiri e entsweng ka dikgwele tse telele e sesanyane ebile e mahwashe. Pampiri e entsweng ka mokedikedi wa dikgwele tse kgutshwanyane e ka nna ya se be matla, empa e bonolo ho e etsa, e bonojwana ebile e tenya mme e loketse ho sebediswa letsatsi le letsatsi. Ho tlatseletsa moo, mmoane o loketse tikoloho hobane mmoane o nka matsatsi a 120 ho hola ka botlalo ha ho bapiswa le dilemo tse nkwang ke sefate ho hola.
Mmoane e Le Semonya-Tjhefu
Dimela tsa mmoane di ka sebediswa mokgweng wa ho kgutlisetsa mobu setlwaeding ka lebaka la tshilafatso e kotsi, ho hula tshilafalo mobung jwaloka sepontjhe. Mmoane o ne o bile o sebediswa ho tlosa dintho tse kotsi tsa radioactive mobung kamora koduwa ya radioactive e etsahetseng Chernobyl naheng ya Russia ya 1986.
Dipatlisiso tse ding ka 2012 di bontshitse ha mmoane o monya ka bokgabane cadmium mobung. Cadmium ke masalla a sefutho sa mafura a masalla a ntho tsa kgale. Mmoane o ka hlwekisa tjhefu e kotsi mobung ho kenyeletswa masenke, meriana e bolayang dikokwanyana, oli e tala le tjhefu ya dithotobolong. Mmoane o lenngweng mobung o tjhefu ha o a lokela ho sebediswa ke batho.
Mmoane e Le Dibeso Tsa Tlhaho
Bafuputsi ba University of Connecticut ba fumane hore mafura a diesel a ka hlahiswa peong ya mmoane wa indasteri. Dipatlisiso tsa yunivesithi di supa hore oli ya mmoane e na le bokgoni ba 97% ba ho fetoha biodiesel mme e loketse enjine efe kapa efe ya diesel e tlwaelehileng.
Dikarolo tse ding tsa semela di ka sebediswa ho hlahisa tahi ya ethanol le ya methanol. Ka nako tse ding e bitswa “hempanol” kapa “hempoline” mofuta ona wa mafura o etswa ka mokgwa wa cellulolysis o bedisang le ho etsa phofudi ho tlhotla ethanol. Ethanol e tlhotlwa ka phofudi kamora ho bediswa ha semela mme methanol e hlahiswa kamora ho tlhotlwa ho ommeng ha karolo e patsi ya mmoane.
Translated by Maletsatsi Sejake