Vito ra xi science: Asparagus officinalis
Vito ra ntolovelo: Asparagus
Nhlamuselo ya Ximilani
Asparagus i ximilani xa mintsembyani kusuka eka ndyangu wa Asparagaceae. Ximilani lexi ximila tani hi ntsumbula e hansi ka misava, laha xitivekaka tani ti crown. Swirhabyani swotala swa huma kusuka eka crown naswona swihumela e handle ka misava naswona lexi hixona xiphemu lexi tshoveriwaka xi dyiwa. Swirhabyani leswi kumbe asparagus spears switshoveriwa loko swinga se kula ngopfu loko swahari swintsongo naku dyeka kahle hikuva loko se swikurile kufika exikarhi ka 15 na 20 cm e henhla ka misava. Loko Asparagus yipfumeleriwa kukula kuhundza laha ya tsindziyela naswona yihumesa tshindi na swirhabyani kutani swiva na matluka yofana na fern.Ximilani xa asparagus xinga kula ku ringana timitara timbirhi hiku leha. Kusuka eka marhavi kuva na mihandzu yintsongo yotshuka yofana na tirhobeyila naswona yitirhisiwa ku endla mbewu leyingata byala swimilani leswi. Loko ximilani xikurile xifika emakumu hinkarhi wa xixikana kuya eka xixika, marhavi yatsemiwa kutani kuhlengeletiwa mbewu leyinga eka wona.
Switirhisiwa
Asparagus yidyiwa tani hi matsavu loko yi virisiwile, yiswekiwile, yi katingiwile kumbe yite tano yiri eka saladi. Yi fuwile hiti vitamin A, B6, C, E na K naswona yina nhlayo yale henhla ya folate, calcium, iron nati protein. Yivikiwa kuva yipfuneta kusivela ti kidney stones. Asparagus yitlhela yi cheriwa e mathinini yi xavisiwa.Swilaveko swa Misava na Ndzulamiso
Loko yinga se byariwa swilava leswaku ku kamberiwa naku lavisisiwa misava leyi kufaneleke ku byariwa eka yona. Asparagus yinga tisa mihandzu hambi loko yibyariwa eka ndzhawu yin’we kuringana 15 wa malembe. Hikokwalaho ka leswi, ku lulamisa misava swina nkoka swinene. Asparagus yi tirha kahle eka misava ya sandy na leyi ya sandy loam. Yinga byariwa eka misava leyingana pH yale xikarhi ka 6 na 7. Nhweti loko kunga se byariwa misava yifanele ku rimiwa kuringana kwalomu ka 600 mm leswaku yita lulamela ku byala. Loko misava yakona yitele ngopfu acid naswona pH yifanele ku tlakusiwa, kutani kukatsiwa lime leyi faneleke leswaku pH yitava e henhla ka 6.Endzhaku ka sweswo misava yirimiwa kuva exikarhi ka 400 mm na 500 mm. Manyoro lawa yafaneleke ku tirhisiwa loko kunga se byariwa se yanga rimeriwa ehansi ka misava xikan’we na lime. Endzhaku ka nhweti loko se u lulamele kubyala, unga chela khemikali ya manyoro naswona u katsa eka 20 cm wa misava yale henhla hiku tirhisa xikomu. Leswi swi basisa naku levelandzhawu leyi kufaneleke ku byariwa eka yona xikan’we na kususa nhova leyinga vaka kona. Kutani se u lulamerile ku endla ti foro laha ungata byala ti asparagus crowns.