Bolemirui jwa alpaca mo Afrika Borwa ke bodirelo jo bo nnye. E simolotse go sale gale mo dingwageng tsa bo-2000 fa diphologolo di le 60 di ne di lerwe mo nageng gotswa kwa Chile ke Dr Gavin Lindhorst, motsadisi wa alpaca gotswa kwa Inca Vale Alpacas gaufi le Wellington kwa Kapa Bophirima.
Di-Alpaca di tsholwa jaaka diphologolo tsa fa gae, ke batlhokomedi ba ba manontlhotlho ba dinku, di tsholwa jaaka leruo la tsadiso, mme fela thata di tsholelwa tlhale ya tsona ya boleng jo bo kwa godimo e e dirisetswang diaparo tse di logilweng.
Di-Alpaca di na le dinao tsa dikgato tse di sireleditsweng, thulaganyo ya tshilô-dijo e e manontlhotlho mme di bontsha kganetso-kgatlhanong e e kwa godimo ya metlhampepe ya ka fa gare le ya kwa ntle. Dintlha-tshupo tseno, mmogo le tlhale ya tsona e e boamogano e e matshwanedi go diaparo tsa manobonobo, di neela alpaca e e ruilweng bokgoni jo bo golo mo tlhagiso-kgwebong ya bobowa jwa alpaca.
Alpaca ke Eng
Di-Alpaca (Vicugna pacos) ke diamusi tse di tšhôtlhang tse di tsalanang le lolapa lwa kamela ya Amerika Borwa mme di tlholega gotswa kwa Dithabeng tsa Andes kwa borwa jwa Peru, Bolivia, Ecuador le karolo e e kwa bokone jwa Chile. Bontsi jwa di-alpaca tse di 3 - 5 million tse di kwa Amerika Borwa bo fitlhelwa kwa Peru, kwa dikgaolong tse di mo bogodimong jwa 3 000 m gotswa mo boalông jwa lewatle.
Di-Alpaca ke mofuta o o gaefasitsweng wa vicuñas, eleng ditšhôtlhi tsa Amerika Borwa (ditšhôtlhi ke diphologolo tsa mala a dikarolwana di le nne) tse gape di neng di dulela kwa godimo kwa thabeng tsa Andes. Maloko a mangwe a lolapa lono lwa kamela a akaretsa llama le kamela ya Bactrian e e serota-pedi e e tlholegang kwa Asia.
Le fa di neelana ka nama go batho ba kwa dinageng tse di tlholegang kwa go tsona, di-alpaca go le gantsi di tsadisetswa bobowa jwa tsona fa bontsalaatsona, eleng di-llama tse di kômôta, di tsadisetswa go kuka merwalo e e bokete. Alpaca ya maoto a maleele e golela kwa boleeleng jo bo ka dirang 94 - 104 cm (kwa legetleng) mme e ka nna bokete jwa magareng ga 55 le 85 kg. Di tshela go fitlha kwa dingwageng di le 20 mme di na le paka ya go dusa ya dikgwedi di le 11.5.
Di-Alpaca di podimatseba, di keletsokitso, di sisibetse mme di bonelwa-pele, di tlhoka tshedisano ya di-alpaca tse dingwe. Diphologolo tseno tse di bonolo di le botlhale di bonolo go ka tsholwa mme di fetoga ka bonako go nna diphologolo tsa fa gae tse di botsalano go bana le dinja.
Di-Alpaca di dirisa medumo (sekai, kopelelo-tlase e tshesane) le puo ka mmele (Sekai, ditshekamiso tsa tlhogo le metsamao ya ditsebe) go tlhagisa maikutlo. Di na le pono le kutlo tse di ntle thata mme di ka dirisa modumo-tlhagiso o o tshwanang le staccato fa di lemoga kotsi. Fa di tshogile, di tlile go tsamaya ka motlhape mme di ka kgwa mathe fa di tshogile kgotsa di tenegile.
Fa vicuñas tse di tlhaga di golela mo dikgaolong tse di kwa godimo tse di omeletseng kgotsa mo go tse di kwa tlase tse di metsi, di-alpaca tse di gaefasitsweng ka go tshwana di tlwaela lefelo bonolo mme di boitshoko, fela gantsi di fitlhelwa kwa mafatsheng a polase le mo maemông a temôthuo ya 'free-range'.
Tlhagiso ya Alpaca mo Lefatsheng
Peru, kwa bontsi jwa di-alpaca di fitlhelwang teng, e na le bomadi jo bo gaisang le madirelo a tlhale a a atlegileng. Ke motlhagisi yo mo golo go gaisa wa bobowa le dikhai tsa alpaca mo lefatsheng, mme e tlamela mo go ka nnang 80% ya ditlhagiswa tsa alpaca tsa lefatshe.
Metlhape ya alpaca ya kwa Canada, Amerika, New Zealand le Australia e a gola mme go bonelwa pele gore ka ngwaga wa 2020 Amerika e ka kgona go neelana ka mo go fitlhang 25% ya tlhagiso ya alpaca ya lefatshe.
China ke moreki yo mo golo go gaisa wa tlhale ya alpaca mo lefatshe.
Australia e tsweletse-pele thata mo temeng ya bomadi jwa alpaca le tokafatso ya letsopa mme ke motswedi yo o siameng wa di-alpaca tse di lerweng mo Afrika Borwa.
Ditiriso tsa Alpaca
Le fa di-alpaca e ne ele diphologolo tse di gaefasitswe tse di neng di dira jaaka batshedisane, metswedi ya dijo le ya tlhale go merafe ya bogologolo e e neng e tshela kwa Dithabeng tsa Andes; di-alpaca mo Afrika Borwa di tsadisetswa thata tlhale ya tsona. Ditlhale tse di tshesane thata di dirisetswa go roka le go loga dikhai tse di farologanang gotswa go diaparo tsa masea goya go disutu tse di manobonobo.
Morafe wa kwa Amerika Borwa wa Quechua o o dulelang kwa bogodimong jo bo kwa godimo o santse o ja nama ya alpaca, fela phologolo eno ga e dirisiwe mo kgwebong ya nama kgotsa mašwi. Alpaca e na le dithoba tse di nnye thata - tsa bogolo jwa dintlhane tsa pensele - mme go thata go ka di gama ka seatla.
Ditona tsa alpaca gape ke diphologolo tsa madiso tse di matsetseleko mme di dirisitswe ka katlego e kgolo jaaka batlhokomedi ba leruo go metlhape ya dinku mo Afrika Borwa. Di na le bokgôni jwa tlhôlêgô jwa go disa jo bo botlhale mme di tlile go kgwa mathe, tsa suma, tsa loma le go raga setlhasedi sengwe le sengwe se se tshosetsang motlhape wa 'tsona'.
Di-Alpaca gape di rekiswa jaaka diphologolo tsa tsadiso go tokafatsa sere-bomadi sa di-alpaca tsa tsadiso tse dingwe le go dira diphologolo tsa gae tse di botlhale tsa tšhakgalô e e sa tsenelelang.
Translated by Nchema Rapoo