Mina Namkhana Yena?
Ubabawakwami bekayindoda elungileko. Bekahlala ekhulumela phasi nami, begodu ahlala alungile. Kodwana kwathi lokha iminyaka ikhambako singabi nabentwana, umndenakhe khulukhulu unina, wabanelunya kimi.Gade angibiza ikunzi, uyabona eTranskei sisebenzisa iinkunzi ezine ezibotjhelwelwe ngambili ukupeta amasimu.
Iinkomo bezifana nabafazi, ziletha abentwana, kodwana iinkunzi bezenza woke umsebenzi obudisi ofana nokuguga iinkuni ezikulu ezibuya ehlathini. Umamazalami gade angifanisa nekunzi ngombana ngingabelethi. Gade ngikwatile begodu ngizwe nobuhlungu, ngangifuna ukukhamba.Ubaba wakwami wathi, ’ungatjhwenyeki akusithi sodwa esinganabantwana.
Abanye abantu abadala, abanabo abentwana, kodwana basatjhadile. Sitjhadile begodu kufanele sihlale soke size sihlukaniswe kukufa’. Kodwana umndenakhe bewufuna bona sibe nabentwana abanengi, begodu gade bangatjheji bona yena ufunani. Nanyana indlu izele bantu, gade bakhuluma ngokungisunduza.
Gade baphinda bathi ’Akafani nabanye abafazi, uyikunzi’ Gade kungibulala, ngangingazi bona ngimi namtjhana nguye obhalelwa kukuba nabentwana.
Isibeletho Esinetjhefu
Ngelinye ilanga bangisa kwadokgodere, owathi indodami iphilile, kodwana mina isibeletho sami gade sisilaphazekile. Lokhu kwenza bona woke umuntu akholwe ukudlula ekuthomeni, bona ngimi unobangela. Ngamtjhiya uMzwandile khange ngimtjele nokumtjela, ngemva kweminyaka esithandathu sitjhadile.
Ngangimtlhuwela hlangana namanye amadoda, begodu ngangifuna atjhaphuluke. Ngangimumorosela isikhathi ngombana ngibhalelwa kumbelethela abentwana begodu ngangifuna athathe omunye umfazi, alinge godu, ngangiqabanga njalo. Ngeza Ekapa.
Khange sikhulume isikhathi eside,kodwana ngelinye ilanga kwafanela bona ngiye ekhaya e-Eastern Cape, ngezwa bona gade abuza ngami emndeninami, bona ngizokufika nini ngombana afuna ukungibona. Ngazi bona usangithanda. Kwathi ekugcineni nangimbonako kwakulilanga elidanisako, walila.
Wangitjela bona akakholwa bona ngangingakamlungeli kodwana wayesele atjhade omunye umfazi ogade anabentwana ababili bendodakhe yaphambilini, begodu ufuna bahlukane. Ngelinye ilanga umalume wangitjela bona amaphepha wesehlukaniso afikile, kodwana khange ngiwathole ngombana ngangingekho ekhaya mhlokho.
Ngihlala ngiqabanga bona nakhibe umndeni wendodami gade wehlukile, ngabe sisatjhadile. Ngiyazibuza, 'kungebanga lani singakhange sibe nabentwana? Iimpilo zethu ngabe zaba zihle.' Akhange abe nabentwana nomfazakhe omutjha. Ngihlumbana bona into eyenzeka kukobana inyanga yamhlaba, ukuqiniseka bona angabi nabentwana.
Translated by Busisiwe Skhosana