Umsebenzi Webuntwaneni
Kwathi lokha ngibaneminyaka elisumi,ngasengimdala ngokwaneleko bona ngingarhelebha umma nobaba. Njeke ngangazi bona basebenze budisi kangangani begodu ngangiziqhenya ngabo.
Njeke malanga woke ekuseni, bengithatha umthanyelo ngithanyele ijarida ngokuzikhakhazisa, ngizama ukulunga bengihlakaniphe njengabo.
Nagade ngikhe ngazama ukuzwelela umtjhiso wengubo zami, ubaba gade azokuza neswazi elincani ukuqiniseka bona ngiyavuka. Kwakungabuzwa, bengeze ngaphuma endleleni nakancani.
Sasifundiseke kuhle soke sobahlanu, sasifundiswe ukusebenza budisi, njengaye, ngaphandle kokudinwa. Njeke kusukela elangeni lami lamabeletho, lalokha ngenza iminyaka elisumi, ukuya phezulu ngangivuka ngeiri lesine ekuseni.
Ukuhlolelwa Ubuntombi
Nakufike isikhathi sokuhlolelwa ubuntombi, umma gade athenga isakadugu elimhlophe enzela umnyanya lo.Nagade kwenzekile bona abomma bathole bonyana ngisese yintombi nto, munye wabo bekaya ngaphandle avayize isakadugu lelo emadodeni asebandla. Nangabe angisesesulwa, abomma bebeza ngaphandle bangakaphathi isakadugwelo.
Ngangingasabi ukuhlolwa, ngombana nganginganalo isokana. Kimi, abommaba bavayiza isakadugu.Woke amadoda azigedla, athoma amomotheka, batjhisa impeyibhu zabo, namagwayi.
'Siyathokoza,siyathokoza,' batjho njalo kibo boke abommaba. Mhlokho ngemva kwamadina ubaba wangihlabela imvu, ukungihlonipha, kwathi entambama, sabane-braai ekulu yokugidinga.
Ukuhlolelwa ubuntombi kwakumkhuba owabeletha isiko lethu lehlonipho. Kwakubudisi kithi abantazana, kodwana sasingali, ngombana kwakuyincenye yepilo, begodu mina khange ngenze into ababelethi bami egade bangayifisi.
Umtjhado WesiXhosa
Abazali bami bobabili gade babotitjhere abakufundeleko, begodu bengisithanda isikolo. Bengifuna ukuba ngutitjhere nami,njeke ngemva kweminyaka emithathu yemabangeni aphakemeko, ngaya esikolweni sokubandulelwa ukuba ngutitjhere.
Ngaphasa iimfundo zami kodwana khange ngisebenze njengotitjhere, ngombana ngonyaka wokugcina wemfundwezo kwafanela bona ngitjhade. Ubaba wangikhethela indodami, uOtto Qayiya, satjhada umtjhado owathatha amalanga amabili ngezi-5 nezi-6 zakaTjhirhweni ngonyaka ka-1965.
Sabhala iimemo ezinengi engcetjhaneni zembapiri ezinengi sazinikela abentwana abancani bona bayozinikela uhlokokhulu esikolweni. Ngesikhathi sokudla, boke abentwana banikelwa iimemo lezo bona, bazise bemakhabo.
Ngendlela leyo indawethu yoke yazi ngomtjhado lo. Le kwakuyindlela ekhabe simema ngayo nangabe kuzokuba nomtjhado.
Satjhadela esontweni le-Anglican, baya ekhabo Otto lapha woke umuntu gade asilinde khona balilizela, abomma abembethe amahasikune amhlomphe, nezambatho zabo ezihlaza kwesibhakabhaka kanye nokupinki ngeminyaka yabo-1960, namadoda agade ambethe iinsudu ezinzima kanye namarhembhe amhlophe.
Safika salotjhisa woke umuntu, sibaqhawula nangezandla, bangena ngendlini bayokudla. Gade kuhlatjwe izimvu ezine kanye nekomo ekulu yinye. Kwakumnyanya omkhulu, kudliwa inyama isitampa kanye nereyisi.
Amasiko Wesintu
Abantu abanengi endaweni zemakhaya bebasambatha izambatho zesintu lokha nangikhulako. Abomma gade bembatha iskeyidi kwaphela nemincamo, bese kuthi amadoda ambathe iingubo emahlombabo ezinye bazibophe emadinini.
Abantwaba gade bangayi esontweni, nabantwababo gade bangayi esikolweni, gade batlhogomela amasimu kanye nenkomo, nembuzi. Izinto zazibukhethu.
Translated by Busisiwe Skhosana