Nna Goba Yena?
Monna wa ka e be e le motho yo botse kudu. O be a dula a bolela le nna gabotse e bile o be a le botho ka mehla. Eupša ka morago ga mengwaga; re se na bana, ba lapa la gagwe, kudukudu mmagwe, o ile a thoma go ba šoro. O be a hlwa a mpitša pholo. Mo, Transkei re be re šomiša dipholo tše nne, di swaragane ka bobedi, go di šomiša go lema.
Dikgomo di be di swana le basadi, di tliša bana, eupša dipholo di be di šoma ka maatla, go goga megoma ye kgolo le go rwala meropa ya meetse goba go rwala mekgobo ya me kgolo dikota go tšwa sethokgweng. Mmatswale waka o be a re ke swana le pholo ka lebaka la gore ke be ke se na bana. Ke be ke befetšwe e bile ke kwele bohloko gomme ke be ke nyaka go sepela.
Monna wa ka e be a re, 'o se ke wa tshwenyega ga se rena fela bao ba se nago bana. Batho ba bangwe ba bagolo ga ba na bana, gomme ba sa le mmogo. Re nyetše gomme re swanetše go dula mmogo go fihlela re hlokafala.' Eupša ba lelapa la gagwe ba be ba nyaka bana ba bantši go rena gomme ga sa ba mo theeletša.
Le ge go be go tletše batho ka ntlong, ba be ba bolela ka go nraka. Ba rata go boeletša ba re, 'ga se mosadi wa go swana le ba bangwe, ke pholo.' E be e nkweša bohloko. E bile ke be ke sa tseba gore e be e le nna goba monna wa ka, yoo a bego a sa kgone go ba le bana.
Popego ya Mpholo
Ka nako ye nngwe ba ntšere ba nkiša go ngaka, yo a ilego a re monna wa ka e be a lokile eupša nna bopego ya ka e na le ditšhila. Se se dirile gore motho yo mongwe le yo mongwe a dumele gore ke phošo ya ka. Ke ile ka tlogela Mzwandile ka ntle le go mmotša, ka morago ga mengwaga ye selelago ke nyetše, ke be ke mo kwela bohloko gare ga banna ba bangwe gomme ke be ke nyaka go mo lokolla.
Ke be ke mosenyetša nako ka lebaka la gore ke sa kgone go mo fa bana. bana, le mosadi yo mongwe o swanetše go tšea le go leka gape, ke be ke nagana bjalo. Ke tlile mo Cape Town. Ga se ra bolela ka nako yeo. Eupša, ka nako ye nngwe, ge ke boela gae mo Eastern Cape, ke kwele gore o ile a botšiše ba lapa la ka gore ke tlo fihla neng ka gobane o be a nyaka go mpona.
Ke a tseba gore o a nthata. Mafelelong ge ke ya go mmona, go be go le manyami kudu gomme o be a lla. O ile a mpotša gore ga a dumele gore ke be ke sa mo lokela, eupša o be a šetše a nyetše motho yo mongwe, mosadi yo a na lego bana ba babedi le monna wa pele. Gomme o be a nyaka go mo tlhala.
Ka nako ye nngwe mme malome o ile a mpotša gore dipampiri tša tlhalano di ile tša tla eupša ga se ka di bona, ka gore ke be ke se ka gae. Ke na le go nagana gore ge nkabe lapa la monna wa ka le fapana, re ka be re sa le mmogo.
Ke a ipotšiša 'ke ka lebaka la eng re se na bana? Maphelo a rena na tla ba bose.' O be a se na bana le mosadi wa gagwe yo mofsa. Ke nagana gore seo se diregilego e be e le gore; Ngaka ya setšo e ile ya mo hlaba, go netefatša gore a sa ba le bana.
Translated by Lebogang Sewela