E-Sewula Africa, ukufuywa kweemfesi zokukgabisa kuqalwa njenge-‘Cinderella’ okusihlobo seemfesi ezidliwako abosolwazi befuyo yemanzini nebe-indastri lee bathi lokhu angeze kwatjhuguluka njenganje.
Abafuyi abanengi abancani beemfesi zokukgabisa nomfuyi munye omkhulu babakhona godu bakhambe iminyaka neminyaka kodwana akhenge khekube khona abakhiqizi abakhiqiza iimfesi eziletha umehluko emnothweni weSewula Africa. Zinengi iinzathu zalokhu, kodwana eziqakathekileko iinzathu manani nekhwalithi.
Iimfesi zokukgabisa zifuyelwa ubuhle bazo ingasikudliwa begodu zidura khulu. Lapho ekunemali yokuthenga izinto eziqakathekileko zepilo kwaphela, iimfesi zokukgabisa azikho ephepheni lezinto ezithengwako.
Abathengi Beemfesi Zokukgabisa
Abantu abakgola imali enengi namarhwebo akgwabisa ngeemfesi ezisematankeni ngibo abathengi beemfesi zokukgabisa. Emiphakathini ehleleke kuhle lapho ekuhlala khona abantu abanjingileko, abanakekeli beemfesi abakhethekileko ngibo ebenza bona kube nenani elinengi labantu abafuna ukufuya iimfesi zokukgabisa esikhathini esinengi babebatjale nemali enengi ekuthengeni iintanka zeemfesi nezinye iinsetjenziswa.
Inarha ye-Germany neye-Holland, zimbonelo ezihle zeenarha lapho ukufuywa kweemfesi zokukgabisa kungenye yendlela abantu abakwenzela ukuzithabisa begodu kukhule ngendlela yokobana kulekelela ipahla ethengwa kweezinye iinarha, ukusabalaliswa kunye neminye imisebenzi ekusezingeni lefuyo yeenkomo nensetjenziswa zakhona. Iinarha lezi zinemiphakathi neenqhema zabafuyi beemfesi zokukgabisa abahlanganako, bakhiqize imibhalo emayelana neemfesi begodu bebahlele amakhambo wokuvakatjhela iinarha lapho iimfesi zokukgabisa zabo zivela khona. Inarha ye-Lake Malawi kunye neye-Amazon River ngizo ezivakatjhelwa khulu.
I-Sewula Africa isesekude nalokhu. I-indastri yeemfesi zokukgabisa ESewula Africa yabaphezulu ngeminyaka yabo 1990s kusukela lapho solokho iyehla. Lokhu kubangelwa mnotho weSewula Africa ofadalalako kunye nobukhulu bokusetjenziswa kwe-internet ‘neminyaka yamakhomphyutha’ lapho ukuzikhipha isizungu ngokufuya iimfesi sekwaqedwa lithando lokulandela ama-social media kunye nokusebenzisa nemitjhini esebenzisa igezi khulukhulu ngabantu abatjha.
Ukukhiqizwa Kweemfesi Zokukgabisa
Ukukhulisa nokunakekela iimfesi zokukgabisa akusilula njengombana kumkhakha lapho isidingo seemfesi zekhwalithi ephezulu ziqakatheke khulu. Iimfesi zokukgabisa zikhiqizwa ngobunengi eenarheni ezikude epumalanga (Far East), njengeenarha ezifana ne-Singapore, Taiwan, Japan kunye ne-Israel, ekungizo eziphuma phambili. Iimfesi zokukgabisa ezingaba yi 95% zithengwa yiSewula Africa kusukela kilezi iinarha.
Banengi abatjhidelene nalomkhakha-inarha ye-Singapore inamaplasi weemfesi ezingaphezulu kuka 400 ngalokho iphaliswano linengi begodu ukusabalilisa kufanele kube ngendlela emsinya nehleleke kuhle. Abafuyi abanengi basabalalisa ngokusebenzisa iinhlangano nofana amarhwebo ahleleke kuhle athengisa ngendundu kusukela kibasabalalisi abancani. Abasabalalisi abancani esikhathni esinengi ngababuya emindenini ekhiqiza umhlobo munye nofana emibili yeemfesi. Iimfesi zithunyelwa emarhwebeni weenarha zoke zephasi ngokuwathwala ngesiphaphamtjhini.
Ikhwalithi nemihlobohlobo yeemfesi zokukgabisa ezikhona iyakarisa. Emitjha imihlobo, imibala nobudisi bukhiqizwa njalonjalo, okwenza abathengi bephasini bahlale banetjisakalo kizo. Imihlobo ethileko ithathwa njengama-fads ne-fashions ngengombana labo abazifuyela ukuqeda isizungu bahlala badinga izinto ezitjha ngasosoke isikhathi.
Translated by Busisiwe Skhosana