Igabhogo, ikungu kanye nombethe kwakheka kwamanzi ekurholela ekubeni khona kobuswe eenarheni ekulinywa kizo. Nanyana kungasetjenziswa imithombo yezolimo eqakathelile, igabhogo, ikungu kanye nombethe kurholela ekwenzeni ubujamo bezulu obufanela iintjalo ezithize endaweni ethize.
Igabhogo eSewula Africa
Igabhogo lokha naliwa eendaweni eziphasi, kungasi sentabeni kwaphela, igabhogo lenzeka eendaweni eziphezulu ezisemgceleni ohlangana kwe-35°N kanye ne-35°S – eenarheni ezisepumalanga kanye netjingalanga.
ISewula Africa isenarheni efuthumele esepumalanga eku-35°S – njeke iindawo ezinengi enarheni le aziwi igabhogo. Igabhogo liwa kwaphela entabeni eziphezulu ebusika. Igabhogo eliwako alisilinengi kangako begodu lincibilika msinya ngemva kokobana liwe. Igabhogo lenzeka emafini ahlangeneko adege abizwa bona ma-stratiform ekurhonakala bona alethe nezulu elinengi.
Igabhogo elincibilikako lerholela ekutheni kube namanzi agijimako, arholela ekutheni amadamu azale nokobana amadamu abe namanzi endaweni ezina izulu ehlobo kwaphela. Nakumadaniswa nezulu, akasimanengi kangako amanzi alethwa ligabhogo angasetjenziselwa ukulima.
Indawo ye-Koue Bokkeveld eseduze kwe-Ceres esifundeni sange-Western Cape yindawo ekulu yokulima, enentjalo ezifana namazambani, kanye nenthelo, lpaha igabhogo liwa khona amahlandlana ambalwa ebusika emasimini nalapha kutjalwe khona iintjalo.
Ikungu
Ikungu mamanzi amanengi ahlangeneko atholakala eendaweni eziphasi. Ikungu ivamise ukubonwa ehlobo begodu kusukela lada ngemvakwamadina kuze kube sekuseni, kodwana iyaphela lokha amazinga womtjhiso nakathoma ukukhuphuka. Akusikanengi ungayithola eendaweni eziphezulu, itholakala eendaweni eziphasi kwaphela.
Kujwayelekile kobana eendaweni ezipholileko zeSewula Africa, khulukhulu ehlobo kutholakale ikungu.Isifunda saKwaZulu-Natal Midlands sidume ngokuba nenkungu ezinengi.Ikungu
Ikungu evamise ukubakhona ekuthomeni kwehlobo sele kubikwe kobana zibanga umonakalo eentjalweni zesifundeni saKwaZulu-Natal lapha kunebhande lekungu. Indawo ezinebhande lekungu azikafaneleki kobana zingakhiqiza amabele, ngebanga lokobana zibanjwa bulwelwe benkowani i-rust kanye ne-ergot, ezikhiqiza itjhefu, engalimbaza iinkomo ezidla amabele.
Ngakwesinye isandla, iindawo ezinebhande lekungu zitlhadlhulwa njengendawo ezikhiqiza i-avocado, nekuzintjalo ezitlhoga ubuswe obunengi. Njeke, ikungu kufanele nayo itjhejwe lokha nakuthathwa isiquno sokobana ngiziphi iintjalo ezingatjalwa enarheni ethize.
Umbethe
Umbethe mamanzi amathosi amancani atlameka entweni ezingakavaleki ekuseni, khulukhulu, kodwana nentambama ungawawuthola. Ukutjhuguluka kwamanzi la abe ngobujamo obuthize bezulu obubizwa bona yindawo yamathosi. Kwesinye isikhathi phezulu kubanomtjhiso owela ngaphasi kobujamo obujwayeleke kobana bube khona, okwenza bona kutlameke umbethe. Ukutlameka kombethe kutlhoga kobana ubujamo bezulu ebusuku bungabi namafu, begod bungabi nomoya.
Umbethe wenzeka eendawenin ezinengi zeSewula Africa, ngitjho nendaweni ezomileko ezisetlhagwini epholileko kanye nenarheni ehlangana nendawo zeSewula Africa.
Umbethe ohlala wenzeka urholela kobana kungezeleleke amalwelwe ebanga umonakalo eentjalweni ezifana namazambani, i-soyabean kanye ne-Swiss chard. Ukutlameka kobuswe emakarini wentjalo, kwenza ubujamo bezulu obuhle obunobuswe obubanga ukutlameka kwamalwelwe wenkowani.
Translated by Busisiwe Skhosana