Beauty Skefile
Yinye yetintfo tekucala lengitikhumbulako kudla kwetfu imidlalo yebantfwana, kufana nekugcumagcuma kanye nema hula huphu, emigwacweni ye Kulungiswa kwe Kapa. Bantfwana labamnyama, labamhlophe kanye nemakhalatsi, sonkhe sidlala kanyekanye. Bengingati nalokutsi ngilinathivi ngalesosikhatsi.
Ngaya esikolweni semaBhunu futsi ngiyasiva Singisi ngoba ngakhula emkhatsini webantfu bemabhunu. Muva, loko kwatshintja. Ngalawo malanga, loluphawu lolukhomba kutsi ulungele kuya esikolweni kungesikhatsi lapho kufanele ufake umkhono wakho ngetulu kwenhloko utsintse indlebe lekulelinye lisayidi.
Ngako angati kutsi ngangingakanani nangicala esikolweni kepha besengivele ngikhulile, ngimdzala ngisho kunebantfwana labacala sikolwa kulamalanga. Tintfo tatincono muva. Bantfwana banamuhla bahlakaniphe kakhulu. Angeke wente lutfo futsi batakubuta kutsi ukwentelani loko.
Ngalawo malanga, uma ubuta imibuto lefana nale batali bakho bebakushaya bese batsi, ʹUyibutelani yonkhe lemibuto?ʹ ngaloko kuba ngulapho ugcina khona. kuletikhatsi tamanje, bantfwana banalokuningi labakushoko, balwa nawe ngasosonkhe sikhatsi bacabange kutsi banetimphendvulo takokonkhe.
Tenjiwe Tutu
Njengebantfwana, sasinetiseka ngaloko besinako, ngoba besingati letinye tintfo. Bekuyindzawo lenhle. Bekukhona tjani lobobugcwele bugegeletele lendlu futsi sigaba lesingalelikhilomitha khashane bekukhona tintsaba lebetivalwe ngemahlatsi lacinile.
Ngabuyela emuva lapho eminyakeni ngesikhatsi ngineminyaka lemashumi lasihlanu nakutsatfu noma emashumi lasihlanu nakune angisakhumbuli kahle futsi angikhonanga kuhamba sigaba lesidze ngize ngiyofika kuletintsaba, kepha njengentfombatana lencane bengivame kugijima ngiyelapho ngekushesha ngaphandle kwetinkinga, njengelizinyane lelincane, ngitjekula, ngitjekula, ngitjekula.
Mine nebangani bami besivame kwenta badoli ngetinyani letomile temimbila ngemuva kwekukutulwa kwawo ukutulelwe emhlabatsini. Futsi besihle senta tindlu ngetinswati sentele labadola betfu, sifaka tjani sentela kumisa letinswati kutsi ticondze bese sikha timbali letinhle emasimini sitotifaka emakhatsini waletinswati.
Goldie Qayiya
Ngesikhatsi sebuntfwana sami, sasicanca intsaba nje sentela kudlala. Besivame kubabaningi sibe lishumi nesihlanu: babe wabi, make, bodzadze wetfu kanye nabobonkhe bantfwana. Besitfwala emabhakete esitambu sembila kanye nemabhontjisi siyokudlela letulu, sifaka lifutsa lekupheka iHolsum ngetulu kwako.
Besinetingulube letiningi ekhaya futsi besitsi nasihlabe yinye ngaphambilini, besitfwala lenye yalenyama yayo sentela lokuphuma kwetfu lokuya entsabeni siyophumula.
Ngemuva kwekucanca lihora nehhafu besibese sifika khona etulu futsi besibona bubanti betintsaba tigegelete tindlu tonkhe tase St Mark’s, umfula lojuba indlela yawo lowengcela kundzawo ngentasi kwetfu futsi ngalesinye sikhatsi, ngelibanga, tilwane tesiganga. Ngenjwayelo besihle sibona emabhokobhoko, kepha kakhulukakhulu bekuba bojakalazi.
Felicia Mfamana
Bengineminyaka lelishumi nakunye futsi, ngenjwayelo, banganibami bo Nombeko, Jongikhaya kanye na Nomvulazana bebavake kufika sitodlala. Badoli betfu lebebakhiwe ngetinyani temumbila le batali betfu bebawuhlanyela emasimini. Imidlalo yetfu sasiyenta ebuntfwaneni beyikahle kakhulu, kepha njengoba ngangikhula ngabona kutsi angifuni kushada njenhlobo.
Ngangitsandza kufundza futsi ngakhetsa kutsi ngitobanguthishela. Ngitoba nemsebenti lomuhle ngisita bantfwana, futsi ngitokhona kusita batali bami. ʹKumele utfole imfundvo,ʹ babe wami abengitjela njalo. ʹHamba uyofundza kubhala kahle phindze nekukhuluma kahle. Ngifuna nine banfwana nibe nemphilo lelula kunale benginayo, ngako fundza lokuningi longakukhona.ʹ Abekhulumela etukwentfo lakayatiko.
Njengemfana lomncane, wake wasebenta emgodzini emayini; muva wasebenta kandzima emasimini akhe phindze agadze netinkhomo takhe. Bekuyimphilo lemnandzi, kepha lebeyikadze indzima. Abefuna tintfo kutsi tishintje kitsi. Kepha tifiso takhe betingakapheleli. Ngatsi nangiseSigabeni seSihlanu, make wami washona.
Besingahlali ngendlala ekhaya. Bekuhlale kukhona tibhidvo letiningi lebetiphuma emasimini asekhaya futsi besisenga lubisi etinkhomeni tasekhaya. Kepha emva kwekushona kwamake beyingekho imali leyenele yekutsenga tembatfo tesikolwa, ticatfulo tesikolwa kanye netincwadzi. Bengikhatsatekile kakhulu, kanjalo nababe wami, kepha kute besingakwenta. Kwadzinga kutsi ngiyekele esikolweni.
Translated by Phindile Malotana