Canola e tšweletšwa ka peu ye tshesane, ka fao ga e a swanela go bjalwa botebong bja go feta 3 cm, e lego ye e sa išego go feta bontšhi bja dibjalo tša mabele. Ka go mela ga maleba, mabu a seloto a swanetše go ba tshesane ka ntle le go tšwelela makwate a magolo, go ba monola le go se kgohlagane.
Go mela go go diegilego go tla dira gore go be boima gore dibjalwana di phadišane le mahola le gape go di dira gore di be kotsing kudu ya malwetši.
Mehutahuta
Mehutahuta ya go fapafapana e a hwetšagala ka Aforika Borwa, yeo e kgaogantšwego ka dinyakwa tša go tonya ga tšona. Lefelo la Dinyakišišo tša Temothuo le eletša balemirui go ela malwetši a dibjalo hloko, botelele bja go mela, kgonagalo ya poelo le bothata bja mahola ge go kgethwa mehuta le gape go kgetha motswako go fokotša dikgonagalokotsi tša tšweletšo. Matšatši a go khukhuša a fapana go tloga go 70 go ya go 120.
Mehutahuta Ya Mphša
Tlhabollo ya mehutahuta ye mphša ke tshepedišo ye e tšwelago pele e ikemišeditšego go kaonafatša phadišano le bokgoni bja letseno bja sebjalo. Mehutahuta ye mpšha e dirwa diteko ka go lwantšha dibolaya lehola tša go fapafapana le malwetši, goba ka dithoto tša maphelo tše kaone.
Pšalo
Bontši bja go bjala bo tla fapana go tšwa polaseng ye nngwe go ya go ye nngwe, go eya ka sedirišwa sa go bjala le maemo a mabu. Ka kakaretšo, bontšhi bja peu bja dikilogramo tše tharo go ya go tše nne godimo ga hectare e ya šomišwa, le dibjalo di arogantšwe ka go ka baka la go mela kaone.
Canola ka tlwaelo di bjetšwe go tšwa ka morago ga dipula ka Moranang go fihla pele ka Phupu. Sebjalo se ama ke phišo le kgatelelo ya komelelo ka nako ya go mela le go khukhuša.
Nontšho
Mola tlhaelo ya phepo efe goba efe tla ba le seabe go tšweletšo, naetrotšene le sebabole ke dikarolo tše bohlokwa tše di amanago le kaonafatšo ya poelo. Bontšhi bo theilwe godimo ga bogolo ga sebjalo se se nyakegago seo se tšweleditšwego ngwageng wo fitilego, mohuta wa mabu, mabaka a maemo a bosaa, mohuta wa monontšha wo o šomišwago le mohuta wa tšweletšo, go fa mohlala, ge e ba mekgwa ya go lemarua pabalelo e a šomišwa goba aowa.
Kgopela molemiši wa tlaleletšo goba setsebi sa monontšha go go thuša go hlabolla lenaneo leo le tla rarollago dinyakwa tša phepo ya dibjalo tša gago ka dikgatong tša kgolo tše itšego. Bjalo ka monontšha o hloka go dirišwa ge semela se o hloka go feta go ba theko ye fase. To thibela tshenyo ya peu, naetrotšene le potasiamo di swanetše go bewa kgole le peu le ditirišo tša naetrotšene di swanetše go kgaogantšhwa ka ditirišong tše pedi pedi goba tše tharo.
Phepo Ye Nnyane
Canola e kotsing ya ditlhaelo tša boron le molybdenum gomme e na le nyakego ya godimo ya koporo, lesenke le mankanese go feta dibjalo tše dingwe tša mabele. Ditlhaelo di ka lokišwa ka nako eo goba pele ga pšalo goba ka go gašetša matlakala.
Tšhelete ye ntšhi e ka šomišwa go hlama “phepo ye e lekanetšego gabotse”, eupša ditshenyegelo tše swanetše go lekanetšwa ka bokgoni bja letseno go netefatša gore balemerui ba sa dira poelo go tšwa go tšweletšo. Mašemo ao a hlokago, go fa mohlala, a tla tšweletša poelo ye e fokolago go sa lebelelwe gore monontšha o o lahlelago go ona.
Translated by Lawrence Ndou