Ikhompowusti iphethe izakhi ezinengi kanye namagciwani wehlabathi, begodu kusisenzo esiqakathekile ongasenza ukuvundisa ihlabathi lapha ulima khona ngaphandle kwamakhemikhali. Ikhompostoli izele ngezinto ezafa kade kanye negugu lokondleka. Izinto ezafa kade ezisehlabathi zirhelebha ukwenza ihlabathi bona ihlale inobuswe. Nangabe abakhiqizi abanayo ikhompowusti eyaneleko ehlabathini ezombeleze iintjalo ingasetjenziselwa ukuvala nanyana ifakwe ehlabathini magega neentjalo kwaphela kungasi endaweni yoke elinyiweko.
Umanyoro wenlwane uvamise ukusetjenziswa lapha kulinywa khona ngaphandle kokusebenzisa amakhemikhali kanye nezakhi. Umanyoro ohlaza ungatjhisa iintjalo begodu akukafaneli bona usetjenziswe eentjalweni ezizokudliwa babantu nanyana okumirorho kanye neethelo. Ungasetjenziswa lokha nakutjalwa amadlelo, iintjalo eziqakathekileko zamafutha, kanye neentjalo zokurhabisa.
Unobangela walokho kukobana kunama-bactreria ayingozi emanyorweni angabangela amalwelwe ebantwini. Umanyoro omunye nomunye weenlwane osetjenzisiweko kufanele ukwenziwe ngawo ikhompowusti kuhle. Umanyoro otjhiywe isikhathi wavunyelwa bona ubole ezaleni lekhompowusti, kufanele ufakwe inani elaneleko lezinto zokutjala ezimumethe i-carbon (okuvamise ukobana kube yi-carbon: nitrogen ratio ye-30:1) ukuqiniseka bona kungenelela iinthako ezilingeneko ekhompowustini.
Ngaphasi kobujamo lapha iintjalo zihlala zithabulukile (aerobic conditions), ama-pathogens ancipha msinya kunalokho osebujameni obu-anaerobic. Nangebe iwobhu iphendulwa ngesikhathi soke kuthi amazinga womtjhiso avunyelwe ukufika okungasenani ku-55℃ eemvekeni ezimbili, izinga lama-pathogen lingaphunguka libe lifike lapha angasabonwa khona. Ku-Salmonella, ngitjho nobujamo bomtjhiso banele nangabe i-carbon: nitrogen ratio ingaphasi kwe-20:1. Kodwana okumbi ngokobana ihlale iphendulwa kanye namazinga womtjhiso aphezulu kukobana kulahleka i-nitrogen ngomrhwamuko we-NH₃.
Umanyoro ohlaza okukafaneli usetjenziswe uze uphendulwe magciwani wehlabathi ube yihumasi. Indlela le ibophelela ezinye izakhi begodu ingabangela ukuphunguka kweskhatjhana kwezakhi ezikhona. Ukungezelela, ingarholela ekungezelelekeni kweenunwana ezifana nomneke kanye ne-earwigs.
Abakhiqizi kufanele bazise ihlangano enikezela ngentifikeyidi lokha uwusebenzisile. Umhlobo weenlwane lapha umanyoro usuka khona kufanele waziwe. Kwenziwe into efanako ekudleni okumathambo, iimpondo, ukudla okwenziwe ngeengazi njalonjalo. Akukafaneli kusetjenziwe umanyoro wabantu ekulimeni. Amakaka weenlwane asuka lapha kuphiwa khona ukudla kweenlwane ezifuywe ngobunengi, kanye neemumathi zokudla kwenkukhu azikavunyelwa nakancani. Lapha kulfuywe khona ngobunengi, Ukusetjenziswa kwama-antibiotics kanye nama-hormones, iinlwane azikavunyelwe ukukhambakhamba ngokutjhaphuluka ngikho umanyoro walapha ziphelwa khona ukudla ungakavunyelwa lapha kulinwywa ngaphandle kokusebenzisa amakhemikhali.
Translated by Busisiwe Skhosana