Zingahlala amakambheni afakwe ifentsu elula enomthunzi, nanyana eembayeni ezivulekileko eziletha umthunzi nezinamaboda. Iimfarigi eziphuqukileko, nanyana kunjalo ziba zihle khulu lokha nazifuywe ngobunengi ngehloso yokurhweba ngazo, ebhodulukweni elivikelweko, elingenziwa ngokobana izindlu zazo zivalwe ngci nanyana kancani.
Imetheriyali Yokwakha Izindlu Zemfarigi
Amahogo wemfarigi kufanele bona kurhonakale bona iimfarigi zikhiqizele kiwo, mayelana nendaba zokuledlha, ukutlhogomela umkhiqizo kanye nokuzihlwengisa. Ifluri engakaplesteriwa iyamukeleka lokha nawufuye iimfarigi ezingakaphuquki, kodwana kufanele kuhlale kunendawo eyomileko nehlwengekileko yemfarigi ukobana zirhone ukulala. Njeke kungabagcono nawungenza ihogo enefluri epleyisteriweko, ekulula ukuyihlwengisa. Isamende kufanele ihlale ilungisiwe ukukhandela ukulimala kwazo.
Amahogweni asele aphuqukileko, basebenzisa amahogo afakwe itjhwaratjhwara ukuze iimfarigi ezisese zincani zihlale zifuthumele, bese kuthi ezidala zihlale eflurini eyenziwe ngesamende. Amafluri la afakwe i-slate esingaba yi-1% ukusuka emuva ukuya ekungeneni bendlu, begodu zenza kube lula kobana ifluri yome msinya begodu ihlwengeke msinya.
Amahogo kufanele abeyi-1,2 meter ukuya phezulu begodu ngesinye isikhathi abe made ukudlula lokhu nange unefarigi ethanda ukweqa emhlanjini. Ingaphakathi lamaboda kufanele libe butjhelelezi lingabi namakhona aqijileko angazilimaza.
Amasenke wesimbi avamise ukusetjenziselwa ukufulela, kodwana kungatjhisa khulu ehlobo. I-manual ye-SAPPO iphakamisa bona upende amasenke lawo abemhlophe nanyana uwavale ngamagatja wemithi ukuphungula umtjhiso ngaphakathi kwamahogo wemfarigi. Ukufulela ngotjani kuhle ngombana amahogo ayaphola ehlobo afuthumale ebusika.
Umfulelo wamahogo kufanele uphakanyiswe udlule iboda emapalini enziwe ngengodo nanyana eensikeni ukuvumela umkhanyo bona ungene, ukungena nokukhamba kuhle komoya ngehogweni.
Emahogweni wesimanjemanie kusetjenziswa i-insulation ukukhandela ukugandeleleka ngokomkhumbulo okubangwa mtjhiso kanye nokuphungula iindleko zegezi, ngokobana ihogo ihlale ifuthumele ebusika nokobana ihlale ipholile ehlobo. Imithereyali eyahlukahlukeneko ingasetjenziselwa i-insulation kodwana abantu abanengi bavamise ukusebenzisa i-polystyrene. Ngokuya ngokwencwadi ka-Dannie Visser, Modern Pig Production, imetheriyali ehle i:
Ayidosi ubuswe
Ayibanjwa mlilo
Ivikela ibhoduluko
Iqinile
Ayonwa msinya zinlwana nanya akusetjenziswa qobe lilanga
Ayonwa mafektha webhawuloji, afana nama-beetles, microbes, iinunwana, amakhondlo kanye nenyoni zomango
Translated by Busisiwe Prudance Skhosana