Naam
MuskadelBeskrywing
Muskadel in Suid Afrika verwys na die Muscat de Blanc à Petite Grains variëteit wat wit muskaat met klein korrels beteken. Dit word beskou as een van die oudste druif variëteite. Suid Afrika produseer die klassieke wit variëteit sowel as ’n mutasie wat dieselfde kenmerke het as die gewone muskadel, maar rooi korrels het. Dit word meestal gebruik vir die produksie van gefortifiseerde wyn.Oorsprong
Daar word geglo dat die Romeine hierdie antieke Griekse variëteit na Frankryk geneem het waar dit in massas aangeplant is in Frontignan. Hierdie variëteit is om hierdie rede ook bekend as Muscat de Frontignan.Ander Name
Buiten Muscat de Blanc à Petite Grains en Muscat de Frontignan is die wit variëteit in Duitsland bekend as Gelber Muskateller en in Kalifornië as Muscat Canelli. Die rooi variëteit is in Australië bekend as Brown Muscat.Produksie in Suid-Afrika
Muskadel was een van die eerste wyne om in 1659, ’n paar jaar na Jan van Riebeeck se aankoms in die Kaap, in Suid Afrika geproduseer te word. Wit en rooi Muskadel tesame met rooi Pontac, wit Frontignac en Steen was van die variëteite wat Constantia se natuurlike soet wyne in die 18de en 19de eeu aan die wêreld bekend gestel het.
Hierdie wyn het ’n gunsteling in die Europese koninklike howe geword en het lofprysinge van bekende digters en skrywers gekry. Jane Austen se Mrs Jennings in Sense and Sensibility het byvoorbeeld die volgende gesê: “a little Constantia for it’s healing powers on a disappointed heart” en Charles Baudelaire het in sy gedig Les fleur du mal dit vergelyk met die sjarme van sy geliefde.
Napoleon Bonaparte het blykbaar toe hy op sy doodsbed lê ’n bottel van hierdie wyn versoek. Hierdie era het in 1886 tot ’n einde gekom toe ’n sapsuigende insek Filloksera (wortelluis) tot die vernietiging van die meeste wingerde in Suid Afrika gelei het.
Van toe af is wingerdstokke op onderstokke geënt wat bestand was teen hierdie insek en vanaf Noord Amerika ingevoer is. Suid Afrika was een van die min lande wat teen die 20ste eeu meer rooi as wit Muskadel geproduseer het. Die situasie het mettertyd verander met rooi Muskadel wat met meer as die helfte verminder het.
Produksie Streke
Terwyl die gebied onder produksie gedurende die afgelope jare aansienlik afgeneem het, kan wingerde steeds in die meeste wynproduserende streke van die land gevind word.
Die Robertson vallei het meer as die helfte van die Muskadel wingerde in Suid Afrika. Die rooi variëteit floreer in die effens alkaliese spoelgrond van die Klein Karoo, terwyl die wit variëteit beter doen in leemgrond. Beide variëteite verkies warm, droë klimaatstoestande.