Chardonnay
Nhlamuselo
Chardonnay i wayeni yo toloveleka swinene leyi endliwaka hi madiriva yo basa laha misaveni namunthla. Lowu i mpfanganyiso exikarhi ka ndyangu wa Pinot na leto hambana hambana leti wuriwaka Gouais Blanc.
Ntumbuluko
France/ Furwa.
Mavito Yanwana
Melon blanc, Pinot blanc Chardonnay, Pinot Chardonnay kumbe Weisser Clevner.
Vuhumelerisi e Afrika Dzonga
Hambi leswi cultivar ayiri kona laha tikweni kuringana nkarhi woleha, vuhumelerisi byisungule kuvakona endzhaku kaloko kuve na swimilani swakona hi malembe yava 1970s. Kufikela kwalaho vuhumelerisi abyi boheka ku endliwa kusuka eka masimu lawa ayari na switsongwatsongwani swinene.
Tani hileswi aswi heta matimba kuya hileswi mfumo awu tirhisa xiswona eka kuva kutisiwa swimilani no byala swimilani swinthswa laha tikweni, ntlawa wa 10 wa vanwamapurasi vavuye vatiendlela swilo hi voxe. Exikarhi ka 1973 na 1980, ntlawa lowu awu ngungumerisa swimilani swingari enawini kuta laha tikweni ra Afrika Dzonga.
Vakote kuhlengeleta swimilani leswi swale Furwa kusuka exikolweni xa wayeni, Geissenheim, nale Germany, laha Danie De Wet, loyi ari murhangeri wa vona, ari khale ka xichudenixa kona. De Wet, loyi anga n’wamapurasi e Dewetshof e Robertson, akuri yena wosungula kungungumerisa swimilani leswintswa swa Chardonnay kuta laha tikweni hi lembe ra 1973.
Tindzhawu ta Vuhumelerisi
Chardonnay yi humelerisiwa eka tindzhawu hunkwato leti humelerisaka wayeni laha tikweni ra Afrika Dzonga, laha Robertson, Paarl, Stellenbosch, Breedekloof nale Swartland kutivekaka tani hitindzhawu letikulu swinene to humelerisa wayeni
Kukula
Nsinya wa cultivar awukuli ngopfu kambe wule xikarhi hi xiyimo, lowungana vuswikoti bya kwalomu ka 5t/ha kuya eka 9t/ha.
Ku Vupfa
Yi hatlisa ku vupfa, emasungulweni ya nhweti ya February.
Mihandzu
Mihandzu ya kona yintsongo, ya xirhendzevutani na muhlovo wa rihlaza rokwalala kuya eka xitshopani. Nhlonge yakona yivevukile swinene, yitiyela no vonikela kasi lendzeni ya vevuka nova na mati yotsokombela.
Matluka
Matluka yakona ayaakulangi ngopfu, ya bumburile yatlhela yakhotseka nyana.
Switsotswana na Mavabyi
Chardonnay ya hluphiwa nyana hi mavabyi na switsotswana swofana na downy mildew na botrytis. Masimu ya yona ya kota kuhanya kahle hambi kuri eka maxelo ya xixika laha kutitimelaka na lomu maxelo yakufumelaka. Ku hatla kuvupfa ka mihandzu swipfuna ngopfu nhlohletelo wa maxelo lawa yo hisa loko swifika eka vuhumelerisi bya wayeni.
Switirhisiwa
Nsinya wakona wutirhisiwa eka xilo xinwe ntsena kunga ku endla wayeni kambe tihunyi ta wona atitshiveriwi. Wu tirhisiwa kuhumelerisa wayeni ya xiyimo xale henhla ya laha tikweni ra Afrika Dzonga. Yitala kuva yikatsiwa na Sauvignon blanc.
Nantswo
Muxaka wa wayeni leyi humelerisiwaka kusuka eka cultivar leyi yiya hi maxelo na misava leyi yibyariweke eka yona. Kasi nsinya lowu wukota ku hanya kahle eka tinxaka tohambana hambana ta misava laha kuvikiwaka leswaku, chalk, clay na limestone hiyona leyi fambaka emahlweni kuva wukota ku hanya kahle.
Minantswo yayona yisukela eka fruity kuya eka tropical, herbal, vanilla, butter na cinnamon. Tiwayeni ta kona tina muhlovo wa nsuku naku twala onge i velvet laha nonweni.
Translated by
Ike Ngobeni