Iindlela Zomtjhado
Emiphakathi yemakhaya, ukukhetha umlingani kwakungasiyinto elula, ngabanga lokobana kulandelwa imithetho ethize. Umzala wokuthoma gade angatjhadi, isithembiso somtjhado emntwaneni gade singenziwa, kodwana ubaba gade angaphakamisa kobana indodana yakhe ithathe yiphi intombi. Isokana gade lithumela udade idzila mnwana nanyana inyeva ukutjengisa kobana lifuna ukumthatha. Nange intombi nayo inekareko, gade nayo ibuyisela idzilanwana elenziwe ngotjani nanyana inyeva, elitjho kobana uyavuma kobana babe nobuhlobo.
Ngemva kokobana uyise lomntazana sele atjengise ngokomthetho kobana uyavuma kobana bangathathana, isokana gade lithumela iinkomo zokulobola emndenini wekhabo lomntazana loyo ezitjengisa kobana umndeni uyavumela. Kwangadlula isigabeso, kwenziwa ezinye iinkulumiswano. Namhlanje ukukhipha ilobolo lisiwe emndenini wekhabo mntazana kusaqakathekile.
Umtjhado wamaTsonga ulethe into edlula ubuhlobo hlangana kwemindeni emibili. Ilobolo liqinisa ubuhlobo hlangana kwemindeni emibili, liletha iimfanelo kanye nembopho ezidlulisa ukufa komlingani. Ukwenza Isibonelo, nange umfazi abhubha ngaphambi kokobana abelethe umntwana, nanyana nange kwenzeka kobana akabelethi, kufanele kubawiwe esinye isihlobo sakhe kobana sibelethe indodakhe umntwana.
Nange indodakhe ibhubha, iinhlobo zayo kutlhogeka kobana zitlhogomele abentwana bomfelokazi loyo, nange umfelokazi asabeletha umfowabo lendoda omcani angathatha umfelokazi kamnwakwabo ohlongakeleko amenze umfazi wesibili abe nabentwana naye, ajamele umnwakwabo.
Umnyanya Wesintu
Umnyanya wesintu usenziwa madoda wamaTsonga. Lokha umntazana owendako asuka ekhabo, uyahlatjelwa, ukubikela abezimu bekhabo kobana sele atjhiya umndeni kanye nabezimu bekhabo. Lokhu kulandelwa kukobana bamnikeze umndenakhe omutjha. Ngemva komnyanya womtjhado ekhabo lendoda ababilaba sele babonwa njengabantu abathathene ngokomthetho.
Ngokwesiko umakoti gade kutlhogakala kobana alandele imithetho yokuziphatha ethize kanye nendlela yokuziphatha emndenini omutjha. Ngemva komtjhado gade ahlala nomamazalakhe emzinakhe omutjha arhelebhe bekhakwakhe ngemisebenzi yekhaya kanye nokupheka. UUmamazalakhe gade amfundisa ngamasiko nemikghwa yekhakwakhe. Gade kutlhogeka kobana aqale iindlela ubabazalakhe kanye namadodana walapho enza ngayo izinto emndenini. Gade avamise ukufudukela emzinakhe ngemva kokobana abelethe umntwanakhe wokuthoma, kodwana gade aragela phambili ngokusebenzisa iziko lakamamazalakhe kuze kuthathe umnakwabo lendodakhe omncani, lapha umfazakhe ekhabe abese uyeza uzokuhlala nomamazala.
Ngemva kokobana umfazi omncani sele afudukele emzinakhe sele aneziko lakhe, yena kanye nendodakhe nontwanabo gade bazenzela umzabo. Ekuthomeni, gade bahlala ejaradeni lekhabo ndodakhe, kodwana ngemva kokobana indodakhe sele ithole abanye abafazi itlhogeko yokobana azakhele wakhe umuzi kade iba khona. Indlela ejwayelekileko gade kungeyokobana indodana yakhe eduze kwakayise. Ogade kwenza bona kutlameke ikoro ethize ngebanga lokobana kutlameka iinzukulwana ezitjha.
Buhlobo gade buqiniswa ngomtjhado, ngebanga lokobana imitjhado elandelako kade yenzeka ngokobana kuthathwe abodade bakamakoti wokuthoma abancani.
Umfazi wokuthoma gade akatelela kobana indodakhe ithole abanye abafazi ngebanga lokobana lokhu kade kwenza ngcono ubujamo bakhe emphakathini begodu kade kumrhelebha kobana arhone ukwabelana umsebenzi nabanye abafazi nabentwababo. Lokhu gade kutjho bona gade babamindeni ehlukahlukeneko kodwana ehlobanako, lapha umuntu ngomunye gade anobujamo obuthize kanye nesibopho sokuzinikela ekuphetheni umncopho othize ofanako.
Translated by Busisiwe Prudance Skhosana