Intenetjha Eduna
Iintenetjha eziduna hlangana nomhlambakho ziligugu khulu begodu zinjalo nje kufuze zibe ngezezinga eliphezulu khulu ngendlela ekungakgonakala ngayo. Intenetjha eduna nengebusako ingakghona ukujarha ezisikazi ezibalelwa kezili-10 ngenyanga begodu izitho zayo zefuzo zidlulisekela lula khulu enzukulwaneni nemadzinyanyeni ukudlula zesikazi. Ngenyanga yinye ingapha izitho zefuzo ezibalelwa emadzinyaneni angaba ma-60 - 80, nokho kuya ngenani ezizala ngalo kanye nesikhathi alisiswa ngaso ukumunya.Intenetjha eduna eyikulwazo kufuze kube lula ukuyifuya begodu kuhle ngokuthi ibe sekhejini elula. Umnyango wekhejayo kufuze ubemkhulu ngokwaneleko ukwenzela bonyana kukghone ukungena nokuphuma kwesikazi.
Eziduna zifuze zihlale ngaphakathi zodwa ngaso soke isikhathi. Ezimbili zingalwa ipi embi khulu beziphawulane lula. Njengombana eziduna zilinga ukufufuzela abomakhelena bazo ngomthondo; amaboda wamakheji avame ukuziinqabo nofana eduze khulu.
Intenetjha Esikazi
Ngaso soke isikhathi thatha esikazi uyise keduna. Ezisikazi zivikela khulu iinkhundla zazo begodu nange uletha eduna kiyo ingayisahlela ngombana ayizwani nokungenelwa.Lokha nawukhetha esikazi ekufuze iyokujarhwa, qalisisa bonyana ubuncani beengono zamabele ezibunane kokujarha ekulu kanye neyeengono ezisithandathu ngeyokujarhwa okuphakathi nofana encani.
Ngaphambi kobana ufake esikazi ngaphakathi kwekheji yeduna, qala uqinisekise bonyana iyatjhisa na. Ikhuphela ngaphandle kwekhejayo bese uyiphendula uyiqalise phasi ezandleni zakho. Ngesandla esisodwa dosa umsila kuhle bese uyigandelela kuhle isitho sayo sangasese. Nangabe izithwezo zincani begodu zinombala obukhobe okumthuthu, ibusele ngaphakathi kwekhejayo, ibethabethe ukusuka ehloko ukuyela emsileni ukwenzela ukuyilungiselela bese uyilinge kwesibili elangeni elilandelako. Esikazi esele ilungele eduna ivamise ukuvuvuka beyibenombala ophephula.
Faka intenetjha esikazi ngaphakathi kwekheji yeduna bese uzibukele. Eduna izoyitjhidela begodu ukujarha kwakhona kumsinya khulu. Eduna izokupongoloza bese esikazi izokuphakamisa iinyonga zayo zemuva ukusuka phasi. Eduna izokupompa kancani bese iyathunda ngokuthi indunguleleke ibonakale njengebholo bese iyawa, iwela ngemuva nofana ehlangothini. Lokhu kuvame ukungathathi umzuzu namunye nofana emibili. Lindela ukujarha kweemzuzwana, bese ukhupha esikazi uyibusele ekhejinayo.
Ekaradeni laleyo esikazi (qala ukugcinwa kwamarekhodi) tlola phasi ilanga ejarhwe ngalo, igama nofana inomboro yaleyo eyijarhileko begodu utlole idayari. Ukusuka lapho, ngokukhamba kwamananga ama-27 iphe ibhoksi lesidleke, usigcwalise ngotjani obomileko nofana ngeengojwana ezincani. Amadzinyanazo azokufika emalangeni ama-30 nofana ama-31 ngemva kojarhana begodu kanengi zizala khulu ngeenkhathi zekuseni.
Esikazi le izokkwenza sayo isidleke khona ngaphakathi kwebhoksi ngokusebenzisa izinti ephiwe zona begodu ihluba uboya besifubeni nebemathunjini ukwenzela iinlalo zamadzinyana. Akukavami khulu ukuthi intenetjha le izalele phambi kwabantu.
Intenetjha le izala msinya khulu begodu ikhotha amadzinyanayo msinya khulu bese ibusele afileko ngehlangothini. Nasele omile iyathoma iwamunyise. Ezisikazi zivamise ukudla kabili kwaphela ngelanga; ekuseni nalokha nakutjhinga ilanga. Akukavami ukuthi umfuyi wayo ayibone ezeleko nekhulisako nayidlako. Ithanda ukwenza izinto ngokufihla. Uzoyibona namadzinyanayo abuthelelene begodu arhona ngebhoksini.
Ithikazise ngokudla okufana notjani, nofana isitokana se-abhula ne-carrot bese uvula ngokuyelela isidleke sayo ubale amadzinyana bese uqale nokuthi akekho afileko nofana iinsalela. Susa lokho okumanzi lapho alele khona amadzinyana bese uyavala uwasukele amadzinyana lawo ukufikela kusasa ekuseni.
Translated by Johannes Nkosinathi