Isirhunyezo
Kelinye nelinye irhwebo ukugcinwa kwamarekhodi ngikho okudlala indima khulu epumelelweni nekuhlulekeni kwekampani. Kuyadingeka bonyana ugcine woke amarekhodi weendleko kanye neenzuzo yerhwebo – begodu uzwisise bonyana eminye neminye imisebenzi ephathelene nekulima kulirhwebo. Kesinye isikhakhi kusuke kulirhwebo elincani khulu kodwana kesinye isikhathi ingakhula beyibe yikulu ngebanga lokugcinwa kuhle kwamarekhodi. Nerhwebeni leentenetjha elineentenetjha ezine ukuya kezihlanu ezisika, indlela esisekelo yokugcinwa kwamarekhodi iqakathekile.
Yoke imali esentjeniswe ebhizinisini idinga ukutlolwa phasi. Lokhu kufaka hlangana iindleko zeentenetjha, amakheji, iinsetjenziswa zokulawula kanye nokudla.
Imali enganako nakuthengiswe isitoko nofana umkhiqizo kufuze itlolwe phasi.
Nanyana ngisiphi isenzo esifaka hlangana ukuzalisa kudingeka bonyana sitlolwe phasi. Ayikho into embi njengokuthi ukhohlwe ukupha intenetjha esikazi isidleke sebhoksi lokulala bese nawuyihlola ekuseni uthole amadzinyanayo afile, akghadzele phasi ngebanga lamakhaza
Ukugcina amalanga wokulisisa ukumunya kwamadzinyana kuqakathekile.
Amakarada Wamakheji
Yoke ikheji kufuze ibenenomboro begodu ikarada lekheji kufuze libekwe kenye nenye ikheji. Kufuze libekwe ngendlela yokuthi intenetjha angekhe yakghona ukurathula ngokulinga ukulidla begodu livikeleke ekuthambisweni mamanzi nokugcwala ihlabathi. Lingabulungwa nangaphakathi kwefayili linonde liqalwa woke amalanga.Ekaradeneli lekheji, tlola yoke into eyenzeka ngentenetjha leyo, ekufana namalanga wokumithiswa kwayo, ukuzala kanye nenani lamadzinyanayo. Ihlukanise ngamakholomu lapho uzokutlola khona inani lamadzinyana elisese sesidlekeni elangeni lesibili, lesithandathu, keletjhumi nane ukufikela lapho alisiswa khona ukumunya. Iba nenye ikholomu lapho uzokutlola khona inani lamadzinyana afakwe esidlekeni ukusuka kesinye. Inomboro nofana igama laleyo eduna esetjenzisweko ukumithisa esikazi leyo kufuze litlolwe ekaradeni. (Bona isiboneleo seKaradeli i-Hutch Card).
Tlola imininingwana efayilini yamalanga lapho intenetjha leyo ilatjhwe khona ngananyana ngikuphi ukulatjhwa kanye namalanga lapho ziquntwe khona amazipho, ukuhlolwa kweendlebe njalonjalo. Kuhle nokuthi uhlole ubukhulu bomzimba wesitoko salezo ezikhulisako namadzinyanazo. Gcina ilwazeli ngaphakathi kwefayili.
Amalanga wokuhlaba kufuze atlolwe phasi kanye nobukhulu bomzimba beentenetjha ngaphambi nangemva kokuhlatjwa. Lokhu kutshwaya inzuzo elindelekileko.
Amarekhodi agcinwa ngekhomphuyutheni ayatholakala, kodwana adingeka khulu emkhakheni omkhulu weentenetjha.
Translated by Johannes Nkosinathi