Waterbuck
Isidumuka

© Roger de la Harpe

Igama

Isidumuka (Waterbuck)

Ukuvela Nokwakheka Kwayo

Lomhlobo wenyamazana mkhulu begodu unamandla tle, iinkunzi zazo ziphakame ngemitha yinye nane (1.4 m) kanye nesilinganiso sobudisi esimakhilogremu amakhulu amabili namasumi asithandathu. Ezisikazi zincani kuneziduna.

Iinyamazanezi zinesikhumba esimaruthuruthu sombala ozotho oqarheke ngomlotha. Amehlo kanye nepumulo andungulelwe mabala omhlophe, kanye nangaphasi emphinjeni. Inyongayo inebala elimhlophe eliyiringhi. Iindlebeze zayo ezirondo zibonakala lula.

Ziinkunzi kwaphela ezineempondo ezigobenele ngaphambili. Zombili eduna nesikazi zikhupha umnuko ongasimnandi, begodu iphungelo linuka isikhathi eside lapho zihlala khona.

Ukudla/Idayethi

Inyamazana le idla utjani obuseduze neeyalo nofana imithombo engomiko. Zikhamba zizuma bezidobhelele lokha kutlhogeka utjani ezibudlako. Kumhlobo wenyamazana ongakghoni ukuphila ngaphandle kwamanzi, begodu isela amanzi qobe lilanga.

Ukuzala Nokukhulisa

Ukujarhana okunengi kwenzeka khulu ebusika, kodwana kuvamise ukwenzeka kancani kesinye nesinye isikhathi sonyaka. Zivamise ukuzala amaphahla kesinye isikhathi libe linye, ngemva kwesikhathi sekambiso yokumitha esiziinyanga ezilithoba.

Ukuzala okunengi kuvamise ukwenzeka khulu ehlobo. Eemvekeni eziimbalwa zokuthoma amakonyana azelwe, zivamise ukuwafihla emahlathini neenkhothii zotjhani obude nobuminyeneko, ngaphambi kobana alandele abonina ukuyokungena emhlambini.

Ukuziphatha

Kumhlobo wenyamazana ezwana nokuphila ngomhlambi, iinkunzi ezilawula iimfunda zisivikeka ngenturhu nangokuzikhukhumeza. Ezisikazi, amakonyana nezinye ezisakhulako ezizimpohlo zihlangana ngemihlambi.

Isibalo samalunga womhlambi sihluka ngokuya ngamalanga ngombana ezinye zikghona ukuphuma ziye komunye umhlambi nofana umhlambi ungezeleleke ngamanye amalunga.

Zinekghono elihle lokuthaya emanzini, begodu nazisahlelwako nofana zithuselwako zikghona ukubalekela phakati kwamanzi lapho umlambo utjhinga khona khulu. Zinjalo nje zivamise ukutholakala ngemihlambi enamalunga amasumi amathathu.

Indawo Yokuhlala/ Ikhaya/ Isikhundla

Zihlala eendaweni ezimanzi kwaphela, lapho kunamahlathi nofana iimilo eziminyeneko kanye notjani obusezingeni lobukhulu ngesilinganiso esiphaka sobude. Kesinye isikhathi zinokuya eendaweni ezimahlathi avulekileko kanye nemabaleni walapho kukhe kwarhurhula khona izulu.

Lapho Zitholakala Khona

ESewula Afrika zisabalele magega neemforo kanye namadonga weMpumalanga, esiFundeni seTlhagwini kanye neTlhagwini yaKwaZulu-Natal. Muva nje zibuyiselwe e-St Lucia kanye ne-Ithala game reserves yaKwaZulu-Natal.

Amanabazo/Iinlwani Eziyingozi

Iimpisi, amaBhubezi kanye nezingwemabala ngizo ezimanaba amakhulu epilweni yenyamazana le, kodwana ingwenyama, izinja ezizumako kanye neenhlosi zivamise ukusahlela inyamazana le.

Iimbalobalo Ngepilwazo Ezirhunyeziweko

Igama lesi-Latin: Kobus ellipsiprymnus
Isilinganiso sobudisi (esikazi): 205 - 250 kg
Isilinganiso sobudisi (eduna): 250 - 270 kg
Isilinganiso sobude (esikazi): 210 cm
Isilinganiso sobude (eduna): 210 cm
Isikhathi sekambiso yokumitha: 9 months
Isibalo/ inani lamakonyana: 1 calf
Umhlobo/ irhemo: Artiodactyla
Umndenazo: Bovidae
Impondo: 75 cm
Ukuzala nokukhulisa: Zivamise ukuzala kesinye nesinye isikhathi sonyaka nanyana amakonyana amanengi avmise ukuzalwa ehlobo kezinye iindawo.

Ihlathululo Ngemitlhalazo

Imitlhala yenyamazana le iyangobudala nangobulili bazo. Kezinye iba rondo begodu ibanzi kuthi ezinye zinqophe kwaphela.