Violet-backed Starling
Legodile La Mmala Wa Moretologa
Leina
Legodile La Mmala Wa Moretologa (Cinnyricinclus leucogaster)
Tebego
Bokete ba jona ke 45g mme mmala wa mafofa wa bong ka bobedi ga o tshwane. Karolo tsa mmele tse di kwa godimo tsa ya tona, go akaretsa seledu, kgokgotso le maphuka, di phepole o o kareng o wa fetoga fa ole mo leseding. Karolo tse di ka fa tlase di tshweu. Tebego ya mmala e fapaane go tswa go phepole e e fifetseng go ya go e okareng e pinki, seno se ikaegile ka lesedi. Molongwana le maoto a ya tona a mantsho, matlho a na le bokgolokwe jo bo serolwana kwa ntle jo bo dikaganyeditseng bogare jo bo borokwa. Tshegadi ga ena mmala ono wa mafofa phepole o o kareng wa fetoga fa ole mo leseding. Seriba go kwa lemoragong la molala le matlhakore a tlhogo se borokwa ka mola mo magareng o o fifetseng mo mafofeng. Bogodimo jwa magetla, botlase jwa mokokotlo, maphuka le mogatla tsa tshegadi di borokwa jo bo fifetseng, ka matlhakore a a tswapogileng. Mafofa a maphuka a phofo ana le borokwa jo bo rusitseng mo gare. Karolo tse di kwa tlase tsa tshegadi di tshweu, ka mela mo gare e e fifetseng, mme e le sephara fa sehubeng. Molongwana le maoto a tshegadi a mantsho, matlho ana le bokgolokwe kwa ntle jo bo serolwana, ka bogare jo bo borokwa.
Phepo
Le ja maungo. A ja gape le ditshenyekegi tse tse a di tsayang mo dikaleng kgotsa mo moweng ga e fofa, go akaretsa le dintlhwa.
Tsadiso
Ke ditsadise-nosi tsa molekane a le mongwe. Nako ya tsadiso ya tsona ke go simolola Diphalane go fitlha Ferikgong kwa Zimbabwe le Afrika Borwa le go simolola Diphalane go fitlha Tlhakole kwa Botswana. Bong ka bobedi bo tlisa matlhare a botala jwa tlhaga le didiriswa tse dingwe tsa go aga sentlhaga. Dintlhaga gantsi di agiwa mo khuting ya setlhare, 2 goya go 6m gotswa mo lefatsheng. Dintlhaga di agiwa gape mo dipaleng tsa trata tse di nang le phatlha mo gare. Go diriswa boloko kwa boalong jwa sentlhaga, mme bo ka diriswa gape go katela mesima e e boteng. Gantsi mae a le 2 goya go 4 a beelwa. Mae a mmala wa botala jwa legodimo o o timpetseng ka dikôlônyana tse di borokwa jo bohibitshwana mo karolong e kimanyana. Go elama ke ga e tshegadi matsatsi fela a le 12 goya go 14.
Maitshwaro
Ka kakaretso a fitlhelwa ka digopa tse di nnye, nako dingwe a ikarogantse go ya ka bong. Ga se gantsi a kgobakana ka bontsi kgotsa a robala otlhe mo felong go le gongwe. Go le gantsi a bonwa ka dipara kgotsa ka ditlhopa tsa lapa ka nako ya tsadiso. A phela nako e le nnye fa fatshe go sa tshwaneng le magodile a mangwe a mmala o o phatsimang.
Tulo
A ithatela go nna kwa dikgweng tsa tlhaga le dikgwa tsa dinoka. A sela morago thunyo ya ditlhare tsa maungo.
Di fitlhelwa kae
Legodile La Mmala Wa Moretologa le fitlhelwa kwa Namibia, Botswana, Zimbabwe, Mozambique le Afrika Borwa.
