Tshobokanyô ya Paakanyô ya Mmu
Paakanyô ya mmu ke temô ya mmu pele go ka simololwa tshimo. Ga ya tshwanelwa go etsaetsiswa le taolô ya mmu, e leng tlhokomelo ya mmu morago ga gore tshimo e simololwe. Tshekatsheko e e tseneletseng ya mmu ka moitseanape e ka supa gore kgaolo e e umakilweng e lekalekane jwang, mme fa gona le dipharologano di le dintsi, paakanyô e ka diriwa. Seno ebile se ka dira gore mo boemong jwa gore go jalwe mo karolong e le nosi e kgolo ya tshimo, go ka jalwa mo dikarolong tse pedi tse di nnye gore boleng jwa mmu bo nyalallane.Nngwe ya maikaelelo a a botlhokwa a paakanyô ya mmu ke go dira gore mmu o lekalekane mo go kgonegang go netefatsa gore merara e a tshwana go lebilwe boleng le go butswa. Tshekatsheko ya mmu ka moitseanape wa mmu e botlhokwa thata, ka gonne mokgwa o o siameng wa paakanyô ya mmu o ka kaiwa. Tlhokomelo e tshwanetse go nna teng gore go seke ga tlisiwa mmu o o letswatsana kgotsa o o seloko mo boalông, fela ka nako e le nngwe bontsi jo bo kgonegang jwa medi ya merara ya pele e tshwanetse go ntshiwa.
Mo paakanyông ya mmu, diphôsô le ditlhaelô tsa dikhemikhale ya mmu di tshwanetse go baakanngwa. Moitseanape wa mmu o tla dirisa tshekatsheko ya mmu go dira dikgakololô ka ga paakanyô ya dikhemikhale tsa mmu. Fa letswatsana le ka fitlhelwa mo mmung, le tshwanetse go baakanngwa ka motsi wa paakanyô ka go dirisa gypsum le moselemaswe. Gypsum ke sere se se tlhakanngwang le mmu go oketsa tlopelô ya calcium. Mmu o o nang le esiti o ka baakanngwa ka go lokela laeme ka motsi wa paakanyô ya mmu e le go timola esiti ya mmu.