Dipodi ke diphologolo tse di botlhale mme di tsamaya ka kgololosego go ja mere, mefero le diredimela tse dingwe tsa medi e e boteng, tse di nang le seelo sa diminerale se se kwa godimo. Dipodi di tlhoka maatla, protein, di-vitamin, diminerale, fibre (ka bontsi) le metsi, mme go tsona tsotlhe protein ke yona e e tlhwatlhwa-godimo thata. Go sa lekalekane ga di-vitamin le diminerale go ka kganetsa go diragatsa ga phologolo le go isa kwa mathateng a a farologaneng a boitekanelo. Fibre e botlhokwa go tshola tikologo ya lela la rumen e e itekanetseng le go thibela dikgoreletso tsa tshilodijo, fa metsi ele sefepi se se tlhwatlhwa-tlase go gaisa mme nako dingwe se se ikgatholoswang.
Di-Vitamin tse di Tlhokwang ke Dipodi
Vitamin A e neelana ka twantsho kgatlhanong le malwetse mme tlhaelo ya yona e ka baka go dusa go go bokoa, tatlhegelo ya boimana, malwetse a matlho, mathata a khemo le letshololo. Thulaganyo ya tshilodijo ya podi e tlhagisa Vitamin A gotswa go carotene, e e leng teng mo mmopong, digweteng le matlhareng a matala, fela e a tlhaela mo furung ya kgale le phulô.Vitamin D e botlhokwa mo go gôpêgeng go go tshwanetseng ga calcium le phosphorus mme letsatsi le le ntsi le a tlhokega go bona Vitamin D e e lekaneng. Tlhaelo e ka baka kgolô e e bokoa.
Vitamin E e botlhokwa go boleng jwa mašwi le tsadiso. Vitamin E e fitlhelwa mo bontsing jwa difepi tse di foreshe, fela e bona oxidation ka pele, mo furu ya kgale le dithoro tse di fa fatshe di nnang metswedi e e bokoa. Tlhaelo e baka nyemetlhano ya mesifa ya pelo le letlhotlholo. Fibre tsa mesifa di a timpala mme ke ka moo leina ‘bolwetse jwa mesifa e mesweu’. Bothata jono bo ka se diragale kwa mafulong mme diphologolo tse di sa fuleng di tshwanetse go neelwa furu ya boleng jo bo siameng.
Di-vitamin C le K di teng mo tlhageng le mo furung. Di ka dirwa gape ke bacteria e e mo leleng la rumen (Vitamin K) kgotsa mo sebeteng le diphilong (Vitamin C).
Dipodi le diotli tse dingwe di na le bacteria mo leleng la tsona la rumen, e e kopantshang di-vitamin tsa B, fela metlhampepe mo maleng e ka ntsha di B vitamin tse di rileng. Tlhaelo ya di-vitamin tseno e ka isa kwa cerebrocortical necrosis, bothata jo bo bakang matshwao a bolwetse jwa ditshika. Seno ke ka ntlha ya necrosis (go swa) ya disele mo karolwaneng ya boboko ya cortex ka ntlha ya tlhaelo ya thiamine (vitamin B1).Translated by Nchema Rapoo