Go Kera Dipudi tša Masaeboko

©Mohair South Africa

Dipudi tša Masaeboko di ka kerwa dikgweding ye nngwe le ye nngwe ya boselela. Boima bja ulu ya pudi bo fapana go ya ka bogolo - go tšwa go 500g go tšwa baneng go fihla go ka bago 2kg ya ulu go tšwa dipuding tše digolo. Ulu e bitšwa boya bja dipudi, e sego masaeboko. Masaeboko a tšwa mebutleng ya Masaeboko.
Maele a go kera ka kakaretšo:
Pudi ye e hlwekilego e be bonolo go kerwa go feta ye e ditšhila.
Pudi e swanetše go oma.
Go tomola go bonolo go feta go kera, kudukudu go mokeri o thomago.
O seke wa kera lefelo le le tee gabedi, ge fela botelele bja tlhale bo fa boleng bja godimo bja ulu.
Ge e le gore ga se tša kerwa ka mehla, dipudi tša Masaeboko di huetšwa ke diphelakadingwe le malwetši. Moriri o mo telele gape o ka fokotša go bona le mosepelo, yeo e ka šitišago dipudi go ja le go nwa. Gape o ka tsenatsena dipotsaneng go mama.

Go Swara Dipudi tša Masaeboko

©Marinda Louw

Ge o kera dipudi tša Masaeboko, di swanetše go swarwa ka go se fele pelo le go dumelelwa go phela ga bona ga tlhago – go nyaka go tseba le go hlalefa. Go kera go na le kgatelelo dipuding le tshwaro ya makgwakgwa ya dipudi e swanetše go efogwa. Dipudi di ka swarwa ka godimo ga serethe goba ka lenaka, go ya mengwaga ya tšona eupša di se gogwe ka maoto. O seke wa šomiša tša go kgotla tša mohlagase dipuding.
Dipudi di swanetše go bewa thekgong goba go thekgwa ka maoto a gago. Go kera go swanetše go thoma ka morago mafelelong gomme ga šomwa go ya ka pele. Eya ka go nanya gomme a kere kgauswi le mmele wa pudi.

Pabalelo ya Maphelo Nakong ya go Kera

Thibelo ya phetetšo ya bolwetši ke ye bohlokwa kudu nakong ya go kera. Didirišwa tša go kera le dikero (dikere tša diatla goba tša metšhene) di ka fetetša malwetši ka gare ga mohlape bjalo, goba magareng ga mohlape goba gare ga mehlape, ka bjalo ditshepedišo tša polaya twatši tše di nepagetšego di swanetšego go latelwa. Thoma go dipudi tše nnyane la mathomo go thibela phetetšo ya bolwetši go tšwa diphoofolong tše kgolwane.
Pele ga ge go kera go thoma lefelo la go kera kamoka le swanetše go hlwekišwa le go bolawa twatši. Morago ga go kera go fedile, boya bja dipudi ka moka bo swanetše go hlopšhwa, go phuthelwa le go tlošwa ka lefelong la go kera gammogo le go bolaya twatši didirišwa tša go kera. Didirišwa tša go kera di swanetše go bolawa twatši ka tekanelo ya ka mehla go thibela phatlalalo ya bolwetši.
Ge e le gore mokeri o ripile sekhaku puding, mokeri o swanetše go apara borukho bjo bongwe bjo bo hlwekilego. Lefelo la go kera le lona le swanetše go thibelwa twatši.
Diphoofolo tše hwilego ga di a swanelwa go buwa ka lefelong la go kera le diphoofolo tše lwalago ga di a swanela go beiwa ka nltong ya go kerele. Matlalo le makgopaboya ga a swanela go šomelwa ka lefelong la go kerela, a swanetše go omišwa goba a bolokwe ka lefelong la go kera.
Go kera go swanetše go dirwa ka go khetha bakeri bao ba ngwadišitšwego. Kgonthiša gore meripo ya go kera e ya hlokomelwa ka thibela twatši gape le ka oli ya thibela dintšhi ya ntho go thibela phetetšo. Dipudi di swanetše go hwetša dijo le meetse a a hlwekilego ka pela ka moo go kgonegago morago ga go kerwa.
Hlokomela gore o se beye dipudi tše di kerilwego mabakeng a mabe a boso a go swana le go tonya le go koloba. Netefatša gore di na le tšhireletšo gomme o tsentšhe dijo tša mafolofolo a godimo ka kabelong ya tšona.

Translated by Lawrence Ndou