Kwezolimo, abalimi batlhoga ukobana bahlale bakhamba nesikhathi ukobana barhone ukujamelana namatjhuguluko wobujamo obutjhugulukako. Ubujamo bamatjhuguluko la, bungafaka hlangana iintengo ezitjhugutjhugulukako zembaseli, imbewu, ukupakwa kwayo kanye nokudla, iinqunto ezitjha ezenziwa bezifakwe ngurhulumende, ubujamo bemmaraga obutjhugulukako kanye nendlela ezitja zokukhiqiza. Ukutlhogonyelwa kuhle kweplasi kwenza bona kurhonakale bona umlimi akwazi ukuphendula ngcono lokha nakunamatjhuguluko ukwenzela bona alawule kuhle iindleko, anciphise ingozi, enze inzuzo.
Umlimi Njengemenenja
Umlimi unendima ezimbili azidlalako, udlala indima yokuba yimenenja yeplasi kodwana umlimi ngakwelinye ihlangothi. Irhono lokulima lomlimi litlhoga kobana alenze ngokomzimba, kodwana ukutjhogonyelwa kweplasi kutlhoga bona ahlele, athathe iinqunto begodu athome alandele amano ahlele kobana uzowenza kanye nenqunto azithetheko.
Ukutlhogomela iplasi, umlimi utlhoga kobana azi kobana amano awabekileko uzokwenza njani kobana enzeke, iinsetjenziswa kanye namano wakhe, ahlele iinsetjenziwa zakhe-ukusuka eensebenzini, imali kanye nenarha – begodu alawule ihlelo nasele athomile ukulenza.
Into eqakatheke khulu lokha nakutlhogonyelwa iplasi zinqunto ezithathwako. Iinqunto zingasuka ekutheni kutjalwe ziphi iintjalo, kobana zithelelelwe nini iintjalwezo, nokobana ifuyo ithengwephi, kobana kuthengiswe nini, nokobana istoko sifakelwe yiphi imaraga, kobana ngiyiphi i-technology ekhamba phambili engasetjenziswa nokobana zingaqatjhwa njani iinsebenzi ezizokusebenza emaplasini.
Izinto Ezenziwa Nakutlhogonyelwa Iplasi
Hlangana kwezinto ezenziwa nakutlhogonyelwa iplasi kubalwa hlangana:
Ukubona izinto ezingadala imiraro kanye namathuba.
Iinrarululo miraro ezingasetjenziswa.
Ukusebenzisa amano.
Ukulawula ituthuko yamano kanye nokurarulula imiraro.
Ukuhlela izinto ezihlukahlukeneko ezenza bona umngcopho wezinto ezihleliweko ufezeke.
Ukuhlola imiphumela yamano.
Isistimu Yelwazi Lokutlhogonyelwa Kweplasi
Ukobana umlimi arhone ukutlhogomela iplasi lakhe, utlhoga ukuthola isistimu yelwazi. Balitholaphi abalimi ilwazi ngamaplasabo? Ilwazi lemaplasini lingeza ngokuvela emithonjeni emibili, ngaphandle kweplasi neplasini ngokwalo.
Hlangana kwemithombo evela ngaphandle yelwazi lokulima kubalwa ama-website wokulima, ama-app wokulima, iincwadi zokulima, ilanga labalimu, iinqhema zabalimi ebafundako, ama-consultant kanye nama-cooperatives.
Hlangana kwemithombo yangaphakathi kubalwa amarikhodi weplasi kanye nentatimende zemali - okungunobangela wokobana kungebanga lani kwenziwa amarikhodi weplasi nokuwenza bona aqakatheke.
Amarikhodi wokulima avamise ukobana amumathe ama-document afana namarikhodi wemali ekolodwa iplaseli ekutlhogeka kobana ibhadelwe, amarikhodi wamaresidi, kanye nemali ephumako, amarikhodi wensebenzi, amarikhodi wemitjhini kanye namarikhodi wemikhiqizo ekhitjhwe eplasineli.
Kungebanga Lani ilwazi Lezokulima Liqakathekile?
Ilwazi lezokulima liqakathekile ngebanga lokobana limeda ituthuko nokobana iplasi liraga njani lokha iskhathi nasikhambako. Ilwazeli lenza kobana kube lula ukumadanisa kobana iplasi liraga njani nje kuneminyaka edlulileko. Ukuba namarikhodi weplasi nokobana kuhlale kunelwazi elikhona kungarhelebha abalimi kobana babe nomgcopho begodu barhone ukuhlola bona zemmali zijame njani okuzokuya ngokobana umnqopho wabo yini nanyana kobana bazimisele ukwenzani.
Kungarhelebha abalimi kobana barhone ukubona bona baqine kuphi nokobana batlhoga ukulungisa kuphi. Ukuba nomgcopho osepepeneneni kanye namarikhodi asesikhathini kungarhelebha ukutlhogomela iplasi kuhle ngokwemmali,ukwenza ngcono ukuhlelela ukubhadala i-tax, nokuboleka imali lokha nabayitlhogakon kanye nokuhlola kobana iplasi lingenisa imali na.
Kuqakathekile kobana ulawule ngokuqina iimmali eplasini ukwenzela kobana wazi kobana kuphume imali engangani kwesinye nesinye iskhathi enyakeni.
Translated by Busisiwe Skhosana