Iimfuneko Ezisiseko Zokwakha Ikheji Yeentenetjha Efaneleko
Ngaphambi kobana uthenge iintenetjha kuqakathekile bonyana uqunte ngomhlobo wezindlu zazo – umhlobo wekheji, ubukhulu bayo kanye nobujamo. Umuntu angathenga amakheji kodwana, leyo kuyindlela edure khulu, koyonga khulu ukuzenzela wakho amakheji. Iimfuneko ezisiseko zokwakha amakheji weentenetjha afaneleko ngilezi:
Ikheji ephephileko evikelekileko nepha ukuvikeleka kobujamo bezulu. Lokhu kufaka hlangana umthunzi wokuvimbela ilanga kanye nokuvikeleka okupheleleko komoya nezulu.
Ikheji kufuze ibenobuncani obungaba yi-0.6 m² besikhala sangaphasi kwayo kanye nobuncani obuyi-0.5 m bobude bayo. Intenetjha idinga bonyana ikghone ukweqa ukusuka ehlangothini elinye iye kelinye ngokukhululeka begodu ikghone ukulala phasi ngokululeka ngaphandle kokurhwatha emahlangothini. Okuqakatheke khulu, kufuze ikghone ukuhlala ngamahlalo beyiqale ngapha nangapha nokuthi ikghone ukukhambisa ukudla ngemihlathini ukwenzela ukuvikela ukuba nomraro wokuqunjelwa. (Qala isigaba sezePilo).
ikheji ehle kufuze ikghone ukuvikela kizo zoke iinlwani eziyingozi epilweni yentenetjha. Iintenetjha zikukudla eenlwanini ezineni ezifana nezinja, amakhondlo, amakhozi kanye neenkhova.
Iintenetjha kufuze zivikeleke emtjhisweni ngaso soke isikhathi. Amazinga wokutjhisa angaphezu kwama-25 ayikinga begodu kufuze kuyelelwe bonyana amakheji asemthunzini nofana endaweni ethola umoya ngendlela elungileko. Ngaphasi komtjhiso odluleleko, kuqakathekile bonyana kunyenyezwe amasenka ngamanzi ukwenzela ukwehlisa umtjhiso. Amakhaza akasimraro eentenetjheni ezidala kodwana amadzinyana kufuze ahlale avikelekile emakhazeni.
Nangabe zibekwe ngaphakathi kwamakheji weendrada kuqakathekile bonyana undlalele intenetjha le itjhila ezokuhlala phezu kwalo. Lokhu kuvikela iinyawo zayo bonyana zingabi phezukweendrada ngaso soke isikhathi, kodwana okuqakatheke khulu kukuthi kupha intenetjha le indawo yokuphumula ngaphandle kokubanjwa makhaza khulu emathunjini. Enye ingutjana le ingenziwa ngeplanka, ibhoksi lephepha eliqinileko nofana iplanka leraga. Kuqakathekile bonyana iingutjanezi zihlale zihlwengisiwe.
Translated by Johannes Nkosinathi