Metswedi, Poloko, Tsamaiso le Pompo ya Metsi
Metswedi ya Metsi
Metsi otlhe a fitlhelela boalô jwa lefatshe ka mekgwa e e farologaneng ya komotiso e e jaaka semathana, pula, sefako kgotsa mouwane. Go na le metswedi e megolo ele mebedi e re e dirisang mo mabakeng a temôthuo le tiriso ya fa gae, yona ke metsiboalông a a fetiswang ka mosele goya le boalô jwa lefatshe mo melatswaneng le dinokeng goya kwa lefelong la tiriso, ga mmogo le metsi a a ka fa tlase ga lefatshe a a tsamayang goya le mafika a metsi le manga a a mo mmung go fitlha kwa a nnang teng mo boalông jwa lefatshe ka tlhagô kgotsa ka go gogwa ke batho ka tiriso ya dipetse kgotsa didiba.
Poloko ya Metsi
Metsi a bolokelwa mo matamong mme gotswa fao a pompiwa kgotsa fa mokgokolosa o letla a gogelwa tlase go nosetsa mafatshe. Ditatlhegelô ka ntlha ya mowafalo di ka nna kwa godimo fa matamo a na le bogolo jwa boalô jo bo golo. Metsi a ka fa tlase ga lefatshe a pompiwa gotswa kwa dimetareng di le makgolokgolo ka fa tlase ga lefatshe goya kwa matamong, mme go tswa fao a dirisetswa go nosetsa kgotsa mo mabakeng ale mantsi a pompelwa ka tlhamalalô mo dijalong le masimong gotswa mo mafikeng a metsi a a ka fa tlase ga lefatshe. Metsi a a ka fa tlase ga lefatshe gape a ka fitlhelela boalô jwa lefatshe mme a bope metswedi. Mo mabakeng mangwe matsha a tlhagô a bopega gotswa mo metsweding kgotsa mo dinoka di phatlhalelang gona mo mafatsheng a a phaphati, mo sebopego sa lefatshe se letlelelang teng.
Tsamaiso ya Metsi
Metsi a tsamaiswa ka diforo tse di bulegileng, dikanale kgotsa dipeipi goya kwa metsi a bolokelwang le go diriswa teng. Maatla a go tsamaisa metsi a bakwa ke maatlakgogedi kgotsa go pompelwa. Metsi a botoka fa a tsamaiswa ka dipeipi go na le fa a tlogelwa go elela mo diforong tse di bulegileng kgotsa dikanale, ka ntlha ya mowafalo le tshutlhelelo mo mmung.
Go Pompa
Dipompo ka bontsi tsa nosetso di kgweetswa ka motlakase, lookwane kgotsa diesel. Go na le mefuta ya dimpompo ele mebedi e megolo, dipompo tsa centrifugal le dipompo tsa displacement.
Dipompo tsa displacement di dira ka mokgwa o mo go ona metsi a tsenang mo bogareng jwa karolo ya motšhine ka matseno a pompo, mme morago a ntshiwe ka go gatelela pisitene kgotsa setshwafu go tsena ka mo gare ga bogare jwa karolo ya motšhine ka maatla, mme seno se tsenye kgatelelo mo metsing gore a tswe ka mo gare ga karolo ya motšhine ka kgôrô e e tswang. Metsi a a ka mo gare ga karolo ya motšhine a laolwa ke menatlana e e sa busetseng metsi ele mebedi e e mo matlhakoreng a a thulanang. Maatla a a diriswang a ka fetlhwa ka mekgwa ele mentsi ya maatla jaaka phufudi, mowa, diesel le gasoline, kgotsa jaaka mo lobakeng lwa pompo ya hydraulic ram, ka maatlatsamao a a fetlwang ke metsi ka boona.
Mo mabakeng a nosetsô go diriswa dipompo tsa centrifugal gantsi. Pompo ya centrifugal e na le impeller e e nang le dikomiki tse di amogelang metsi mo bogareng jwa yona mme e a dikolose ka mo gare ga karolo ya motšhine, mme ka maatla a centrifugal a ntshwa mo bogareng jwa impeller go tswela goya kwa letlhakoreng le le kwa ntle, mme gotswa fao a tsamaiswe go tswela kwa ntle ka kgorontshetsantle e e bopilweng ya pompo, e e ntshetsang kgotsa go “latlhela” metsi kwa ntle goya kwa peiping ya bontshetantle.
Translated by Nchema Rapoo
