Isthelo esikhulwesi sesitjalo se-dragon sithandwa khulu e-Asia, begodu sihlangana kwenthelo ezihlanu ezikhamba phambili, ngemva kwenthelo ezifana nebhanana, kanye nelychee. Saziwa nangebizo le-pitaya, ngebanga kokwakheka kwaso kanye nombalaso e-China. Iinthelo ezinamandla anezinga eliphasi, ezinepilwezi, zenza okunengi begodu zinezakhi mzimba, kulula ukuzihluba begodu zimnandi khulu nazidliwa zifretjhi, ngemva kokufakwa kancani esiqandisini.
Abakhiqizi abafana ne-Amorentia Estate & Nursery ngesifundeni sangeLimpopo bangenele ijima lokufundisa abanikazi bamarhwebo kanye nabathengi ngenzuzo elethwa sthelo se-dragon fruit ebuya eSewula Africa.
Isetjenziselwani i-Dragon Fruit
I-Dagon fruit itjalelwa iimaraga eziyithengisa ifretjhi, begodu ivamise ukuthengiswa eemarageni zabalimi eSewula Africa. Isthelwesi singalungiswa kwenziwe ngaso imikhiqizo engenisa inzuzo efana namaroli wenthelo ezonyisiweko, ama-bar wenthelo, irhwabalaza, ijemu, ijuzi, ama-pastry, begodu iintanga zaso zingafakwa ku-yoghurt. Ijuzi yomhlobo westhelwesi esibomvu, isetjenziswa njengedayi yemvelo. Iintiya zamakhambi, amanzi, kanye ne-vodka zifakwa umnambitheko westhelo se-dragon fruit, begodu isthelwesi singasetjenziselwa ukwenza iwayini.
Iinhlumaya zethuthumba elingakavulwa laso, zingaphekwa zidliwe njengomrorho, kuthi amathuthumbo waso afakwe emanzini abilako aselwe njengetiye.
Istjalwesi sisetjenziselwa ukuhlobisa engadini begodu sisetjenziselwa ukuvala amafensi ngebanga lokobana liyawatantela.
Iziko lefundo ephezulu iJunivesithi yePitori, lenza irhubhululo ekusetjenzisweni kwesthelo se-dragon entweni zezebuhle.Kutholakale kobana isthelo se-dragon fruit, singaba nenthako ezifana nalezo ezitholakala ku-Aloe ferox kanye ne-Aloe vera begodu zayo zingayidlula ngokuphindwe kalisumi. Hlangana kwenthako zesithelo se-dragon fruit, kubalwa zokuzela, zokujamisa ukuluphala,zokuqinisa kanye nezigcugcuzela ukukhiqizwa kwe-collagen.
Iskhumba sesthelo se-dragon senza i-22% yesthelwesi sesiphelele, kodwana ngiso esilahlwa khulu. Ikelo lesthewesi simumethe izakhimzimba eziyigugu ezingasetjenziselwa ukwenza izinto ezahlukahlukeneko ezifana nama-anthocyanin. Ipuyera yekelo lesthelo se-dragon fruit lihlolwe kumathrayali kwatholakala kobana linomthelela ku-blood fat level emakhondlweni. Enarheni yange-Philippines, ipuyera le isetjenziselwa ukwenza ama-noodle wombala ophinki.
Inzuzo Elethwa Yisthelo se-Dragon Fruit
Inzuzo yezepilo elethwa sithelo se-dragon fruit yenziwa ma-antioxidant, antibacterial kanye nenthako zezakhimzimba, ezirhelebha ukwenza ngcono ukubanjwa malelwelwe, ngebanga lamaleveli aphezulu wamavithamini C, enza bona i-metabolism igaye msinya kanye nokudla kugayeke msinya. I-Oligosaccharides, etholaka esthelweni se-dragon fruit, ingarhelebha ukuphungula ama-prebiotic bacteria emathunjini.
Isthelo esizele umthiya, singarhelebha ukuzinzisa iswigiri egazini, njeke singarhelebha ekudleni okudliwa babantu abaneswigiri. Isthelwesi sizele ama-antioxidant begodu simumethe amavithamini vitamins B1, B2 kanye ne-B3, ama-polyunsaturatedfatty acids,carotene, protein, calcium, potassium, iron kanye nama-phosphorus. Imbewu yesthelo sama-dragon fruit simumethe i-omega-3 fatty acids.
Amagatja kanye namathuthumbo westhelo se-dragon zisetjenziselwa ukwelapha ubulwelwe beswigiri, nanjenge-diuretic begodu arhelebha ukwelapha msinya iinlonda. Ukungezelela, isthelwesi sirhona ukukhandela ubulwelwe behliziyo.
Tjheja:
Ilwazeli lenzelwe umncopho wokufundisa kwaphela begodu akukafaneli kobana lisetjenziselwe ukwelapha. Ilwazeli alikenziwa ngomcopho wokujamiselela ukwelatjhwa okunikezwa babantu bamaziko wezamaphilo.
Translated by Busisiwe Skhosana