Cape Grysbok
Kaapse Grysbok
Naam
Kaapse of Suidelike Grysbok [Raphicerus melanotis]
Voorkoms
Die Kaapse grysbok is 'n klein, skaam bokkie met 'n bonkige lyf en growwe hare. 'n Mengsel van wit en rooierige hare op die rug en sye gee aan hierdie spesies 'n bont, rooierige voorkoms. Slegs ramme het horings wat 60-80 mm lank is, en vertikaal op die kop staan met 'n effense voorwaartse kurwe. Die Kaapse grysbok staan 540 mm hoog by die skouer en volwassenes weeg 10 kg.
Dieet
Dit is hoofsaaklik 'n blaarvreter, en nie afhanklik van oop water nie. Soms wei hulle op sappige gras en eet vrugte wanneer dit beskikbaar is.
Voortplanting
Enkele lammers word reg deur die jaar gebore, hoewel lammers meestal gedurende die lente gebore word. Die dragtigheidstydperk is sewe maande. Onder ideale omstandighede kan ooie twee lammers per jaar hê. Volwassenes is ligter van kleur as lammers. Hierdie spesies raak seksueel volwasse tussen 18-24 maande.
Gedrag
Die Kaapse grysbok is gewoonlik enkellopend, lê gedurende die hitte van die dag, en wei in die nag.
Waar hulle voorkom
Die Kaapse grysbok kom voor in die suidelike bergdale en bos-bedekte vlaktes van die Wes- en Oos-Kaapse provinsies in Suid-Afrika. Dit is endemies aan die fynbos bioom. Sharpe se Grysbok is soortgelyk in voorkoms en gewoontes, maar word in die Lebombo-bergreeks van noordoos-Mpumalanga en verder noord gevind.
