Wetenskaplike naam: Asparagus officinalis
Plant Beskrywing
Die aspersie is ’n meerjarige plant en van die Asparagaceae familie. Die plant groei vanuit ’n ondergrondse risoom wat ’n kroon genoem word. Verskeie lote spruit vanuit hierdie kroon en groei bo-op die grond. Dit is die deel van die aspersie wat geoes en geëet word. Die lote, wat aspersiepunte genoem word, word geoes as dit 15 cm – 20 cm lank, nog nie volgroeid en nog steeds sag is. As die lote toegelaat word om langer te groei, verhard die stingels en bring dit takke met varingagtige blare voort.Die plant kan meer as twee meter hoog word. Klein rooi bessies sal op die takke vorm en dit ontwikkel later in die saad wat gebruik word vir voortplanting. As die aspersie in die laat herfs of vroeë winter dormant is, kan die takke teruggesny en die sade wat daaraan is bymekaargemaak word.
Gebruike
Die aspersie is ’n groente wat gekook, gestoom, gebraai of rou in slaai geëet word. Dit word ook geblansjeer en in blikkies verkoop. Die aspersie is ryk aan vitamiene A, B6, C, E en K asook foliensuur, kalsium en yster. Daar word beweer dat dit nierstene voorkom.Grondvereistes en voorbereiding
’n Behoorlike grondanalise moet voor aanplanting gedoen word. Aspersies kan vir 15 jaar lank op dieselfde stuk grond produktief bly, daarom is grondvoorbereiding so belangrik. Die aspersie gedy in sandgrond of sanderige leemgrond met ’n pH van 6 tot 7. Die grond moet ’n maand voor aanplanting tot ’n diepte van 600 mm omgeploeg word.Indien die grond te suur is moet kalk bygevoeg word om die pH tot bo ses te bring. Daarna moet die grond tot ’n diepte van 400 mm - 500 mm omgeploeg word. Organiese materiaal kan nou in die grond ingewerk word. ’n Maand later, met planttyd, moet chemiese kunsmis in die boonste 20 cm grond ingeploeg word. Dit maak ook die area skoon en gelyk en raak dus ontslae van enige onkruid wat opgekom het. Die aspersiekrone kan nou geplant word.