Ibizo lesayentsi: Curcurbita Pepo
Ibizo elijayelekileko: Isikwatjhi
Umhlobo womgade isikwatjhi wavela ngenarheni yeCentral America.
Ihlathululo Yesitjalwesi
Umholo womgade isikwatjhi kusitjalo esizitantelako nofana umvini we-cucurbit omila isithelo esincani esirondo, esinombala ohlaza satjani okungeneleleko esingaba yi-80 ukuya ku-100 mm ngedayamitha. Isitjalwesi sihluma amathuthumbo aduna nasikazi begodu apholinethwa ziinyosi. Ngakhoke kufanele sitjalwe eduze nalapho ekwakhele khona iinyosi emasimini. Iinyosi eziphilileko zenza isiqiniseko sokobana isikwatjhi sipholinethwa ngesikhathi esifaneleko. Isitjalwesi sinomrabho okhula uyephezulu kufikela ku-60 cm, nanoma imirabho eminengi iyaphezulu nga-20 ukuya ku-30 cm ngaphezulu kwehlabathi begodu ngiyo kumirabho engatjhingeliko eyenza imisebenzi yokunikela amanzi nezakhi esitjalweni nesivunweni. Iimbumbuo zayo zenza isiqubuthu serondo ngaphakathi esenta yesivuno.Ukusetjenziswa
Isikwatjhi siyabiliswa bese kuthi ingaphakathi kwalo elitjheli lidliwe njengomrorho. Kwesinye isikhathi singavunwa njengomrorho omncani bese sidliwe siphelele.Ihlabathi Efunekako Nokulungiswa Kwayo
Isikwatjhi sitlhoga ukutjwalwa esibovini sehlabathi esisela amanzi kuhle. I-pH yehlabathi kufanele ibehlangana no-6 kunye no-7. Ihlabathi ekulinywe kiyo ngaphandle kokufaka iimvundisi zamakhemikhali kufanele ibengaphezulu kwesibalo esijayelekileko. Kufanelekile ukufaka umanyoro nevundela ehlabathini.Ngaphambili kobana kuthome ukulungiselela indawo yokutjala umtjali kufanele athathe ihlabathi encani endaweni lapho ekuyokulinywa khona iyokuhlolwa. Ihlabathi eyokuhlolwa lee kufanele ihlolisiswe elabhorathri ukwenza isiqiniseko sokobana ihlabathi leyo inazo izakhi ezidingekako. Lokha ihlabathi nayilungiselwa ukutjalwa kuhle bonyana ihlawulwe ngendlela engenza bona ihlabathi ihlukaniswe ngamalungu ahlangana no-600 mm ukuya ku-800 mm. Lokhu kurhelebha ekutheni ihlabathi ikwazi ukusela kuhle amanzi ukuqinisekisa imirabho ephilileko.
Lokha iimveke nazi-5 kuya ku-6 ngaphambi kobana kutjalwe kufanele kufakwe izakhi ezifaneleko ehlabathini ezikhambelana nalezo eziphakanyiswe lokha nakuhlolwa ukuvunda behlabathi. Lokhu kungaba yi-lime ye-pH nofana ivundela ne-super-phosphates. Ukufaka izakhi lezi ehlabathini, hlawula ingazululu lehlabathi libe yi-450 mm. Ukuhlawula lokhu kufaka isitjalo nekhula esimini, begodu kwenze bona izakhi zehlabathi ezifaneleko zingenelele ehlabathini.
Evekeni engaphambili kweyokutjala kungathelwa umanyoro endaweni ehlawulelwe ukutjalwa bese kuthi ihlabathi yangaphezulu engaba yi-20 cm ilungiselelwe ukutjala imbewu.
Imbewu iyakhitjwa bese kuthi iplastiki nofana ihlabathi engakafakwa iimvundisi ifakwe ngaphasi ukwenzela bona kungamili ikhula bekwenze bona ihlabathi ihlale imanzi.
Itlayimethi
Isikwatjhi simila kutlayimethi efuthumeleko begodi eSewula Afrika sitjalwa ngesikhathi sethwasahlobo nesehlobo.Singatjalwa nanoma kungasiphi isikhathi sonyaka nakwenzeka bona kungabi makhaza khulu nofana kubenombethe. Isikwatjhi angeze samila lapha ekunombethe khona. Ukukhula kwembewu yesikwatjhi kuthoma lokha ihlabathi nayifika kumathemperetjha angu-16°C+ ukukhula khulu kwembewu kwenzeka lokha amathemperetjha nasele atjhidela ku-20°C.Isikwatjhi sikhula khulu besihlume khulu lokha amathemperetjha nakahlangana ne 20°C no 28°C. Isitjalwesi asidingi amanzi amanengi begodu singatjalwa nendaweni eyomileko enezulu elingatjhugulukiko. Isikhathi esihle sokuvuna kulokha ihlabathi nayiniselelekileko.
Ukulima
Kunemihlobo eminengi emitjha yeembewu ezivangiweko begodu lokha nawuthatha isiqunto sokobana ukhethe imbewu yesikwatjhi ofuna ukuyisebenzisa kungabakuhle ukuthola isiyeleliso sabosiyazi bembewu nofana ubuze i-extension officer yangendaweni yekhenu.Imihlobo eminye eyaziwako yi Gemini, Rolet kunye ne Smarag.
Translated by Busisiwe Skhosana