Tindlu tabologwaja kumele tibelula kutinakekela nekuklina. Kumcoka kutibeka ngendlela yemalayini lahlobile, noma tingaba ngayinye noma tibendzawonye. Iminyango leya emahhokweni kumele ibe mikhulu kahle kwentela kutsi kubelula nakutsatfa labologwaja bakhishelwa ngaphandle nekutsi kubenesiciniseko sekutsi kubelula nakuklinwa.
Ngesigadla sinye, lesivalo singaba ngetulu noma ngaphambili kwalelihhoko, kepha kumahhoko lahlangene, lesivalo kumele sibengaphambili. Lokubamba leminyango kumele kucine kahle kwentela kuciniseka kutsi labologwaja abaphumeli ngaphandle. Uma lamahhoko abekwe ngemalayini, khumbula kwenta indlela kutsi ibebanti kulemikhatsi kuze utokhona kusebenta kahle. Kumele ukhone kuphusha libhara kulendlela.
Manyolo umcoka kakhulu ngekukhicita bologwaja labafuywako kanye netibi. Ungalahli lomanyolo noma lombhedze ngoba ngukona kumcoka lokugucuka kubole bese kwenta manyolo waletibhidvo tasengadzeni yakho. (Buka lesehluko ‘Manyolo’ kwentela kufundza kabanti).
Siyilo sasemende kumele sibe nembhedze. Kungaba yimphuphu yetigodvo, tintsi tekunatsa noma tjani lobomile. Emahhoko etihwayela letihlangene kumele tibe nelitreyi lamanyolo lelihlala emkhatsini walelihhoko. Loku kungaba litreyi lensimbi noma liplasitiki lelicinile lelihhakwe ngaphansi kwendlu lengetudlwana.
Lesiyilo lesingaphansi kwemahhoko kumele siklinwe malula. Umangabe kukhona siyilo sesihlaba, kumele sitsanyelwe onkhe malanga sibe siyilo sasemende singaba nesigadla semphuphu yetigodvo noma sihlabatsi lesingasuswa bese sifakwa entsatjaneni yemcuba.
Kute sidzingo sekusua bologwaja uma uklina emahhoko abo njengoba bologwaja abanandzaba uma kukhona lotsintsa emahhoko abo. Kungaba nje tikhatsi letikabi tekushiswa kwemahhoko lapho khona logwaja abegula, kuyadzinga yini kutsi kube khona losusa lologwaja.
Translated by Phindile Malotana