Umtjhado Emphakathini wamaTswana

Matrimony Process

©Dr Peter Magubane

Umtjhado gade uvamise kobana uhlalwe zinhlobo, iinhlobo zendoda gade kungizo ezikhambisa ihlelelweli. Ukutjhadisa abentwana gade kujwayelekile, kodwana akusenziwa nje. Incenye eqakathekileko yomtjhado kwakukukhutjhwa kwelobolo-(bogadi) elibuya emndenini wendoda. Umtjhado gade uba khona kwaphela ngemva kokobana kukhitjhwe ilobolo. Lokhu kwakutlhadlhula kobana umfazi ungayokubeletha umndanakhe omutjha wekhabo ndoda, ingasi ukobana umfazi uthengiselwa umndeni wekhabo ndoda.

Nange umfazi abhalelwa ukubeletha umntwana, khabe kutjho bona, elinye ilunga lekhabo mndeni womfazi lingabelethela umfazi loyo umntwana nanyana kwakutlhogakala kobana umfazi loyo abuyiselwe ekhabo. Ilobolo gade likhitjhwa ngenkomo, nanyana amanye amaTswana - (Ngwakete kanye nama-Kwena gade bafaka hlangana nezimvu. Namhlanje, nakulotjolwako, sele kulotjolwa ngenkomo zihlanganiswe nemali.

Ukobana kulotjolwa ngemalini khabe kungakhulunyiswana ngakho, kodwana isiqunto sakho kade sithathwa mndeni wekhabo ndoda elobolako, umndeni wekhabo mfazi akusikunengi ekade ingakutjho ngalokho, ngaphandle kokobana babalabale nange bakholelwa ekutheni iinhlobo zekhabo ndoda zingarhona ukubanikeza ilobolo elinengi kunalelo abafuna ukubanikeza lona. Khabe bavamise kobana bababhadale kanye lokha umfazi nasele aya ekhakwakhe.

Iinkomo ekhabe zivamise kobana zibe linani elilinganako khabe likhitjhwa nguyise lakamkamkhwenyani, okhabe abawa umndenakhe kobana ulobolele umkhwenyana, ngokobana abawe umalume likamkhwenyana kobana naye afakele umkhwenyana ikomo yinye, ngebanga lokobana iinkomo abazithola ngodadwabo, (unina lakakhwenyana) zasetjenziselwa kobana yena athole umfazi.

Iinkomo zazithunyelwa ekhabo likamakoti, lapha ekhabe ubabazala azibamba khona iskhatjhana. Ngemva kokobana sele zizele zizinengi, ubaba lakamakoti kade azisabalalisa hlangana komndenakhe, nomndeni wekhabomkhulu, boke ekade kukubabantu ababawe kobana babenendima abayidlalako lokho nakwenzelwa umakoti umnyanya wokobana alotjolwe. Umalume likamakoti kanye nomnakwabo omkhulu ngibo ekhabe banikezwa iinkomo zelobolo zakamakoti.

Isithembu

lokha indoda nayinabafazi abanengi, umfazi ngamunye khabe kufanela kobana abe nomzakhe - imizi kanye namasimu, iinkomo kanye nezinto zabo zakhe zokusebenza azisebenzisa yena nabentwabakhe. Nanyana kunjalo, umfazi othunyelwe kobana ayokujamela umfazi obhubhe anganamntwana, nanyana ongarhoni ukubeletha abentwana, gade baya emzini womfazi egade amjamela. Lokha nakubhubha umfazi omdala, indlwakhe gade ithathwa bentwabakhe.

Abafazi bendoda ethethe isithembu gade babekwa ngokobana ngubani okhitjhelwe amalobolo kokuthoma ingasi ngokobana batjhade nini. Ikuyinto ekhabe yenza bona kuhlalwe kuphikiswana kobana omkhulu ngubani, khulukhulu ngemva kokubhubha kwendoda ebathetheko. Umfazi omdala nanyana okhitjhewe amalobolo kokuthoma kuba nguye omkhuIu, begodu indodana yakhe edala iba yindlalifa othatha izinto zikayise.

Kodwana irarano ngokobana umfazi omdala ngimuphi vane lilandele khulukhulu nange umuntu obhubhileko aregile nanyana anamandla, ngebanga lokobana amazibulo amadodana wabafazi bendoda ethethe isithembu balwela ilungelo lokobana babezindlalifa.

Lokha urhulumende webandlululo apha iinkosi amandla akhethekileko, amanye ama-antropologist azithola abambeke eraranweni lelo, kwesinye isikhathi ekhabe lifika nemakhotho, lokha amadoda nakalelwa ilungelo lokobana athathe isitulo sobukhosi saboyise egade bamakhosi, nekade kubakulapho babiza khona ama-antropologist kobana azokuqinisekisa kobana bamadodana wokuthoma wabafazi abadala.

Translated by Busisiwe Prudance Skhosana