Roussanne

Ihlathululo

I-Roussanne mhlobo wamaderibe wewayini emhlophe adabuka esiphandeni se-Rhone e-France. Igama lawo lisuselwa kelesi-French elithi ‘roux’ (bovu) njengombana kuhlathulula ububovana bamamomori nasele avuthiwe. Kumaderibe angezelela ukunambitha okubabako, ukunotha kanye nomnuko omnandi emivangweni neminye imihlobo efana ne-Marsanne.

Imvelaphi/Indabuko

Adabuka e-France

Amanye Amagamawo

I-Roussanne inamagama angaba matjhumi amabili nasithandathu afana ne-Barbin, Bergeron Fromental and Rebellot. E-California, begade ahlangangahlanganiswa ne-Viognier, kodwana akunabuhlobo phakathi kwemibili le imihlobo.

Amakelo wamaderibe wombala obukhobe i-Roussanne du Var kanye ne-Roussette angaba negama elizwakala lifana naleli, kodwana nalapho awuhlobani newe-Roussanne. Esewula Afrika, umhlobo lo utloliswe njenge-‘Roussanne’.

Umkhiqizo weSewula Afrika

Imihlobo yakwabo yangeniswa enarheni ngu-Simon Barlow we-Rustenberg e-Stellenbosch ngomnyaka ka-2002 newenza iwayini yokuthoma yomhlobo ongakavangwa. Ubukhulu bendawo obungaba ma-75ha we-Roussanne utjalwe eSewula Afrika ngaphandle kweendaweni ze-Northern Cape, Robertson kanye ne- Worcester. Iintjalo ezinengi zifaka hlangana ezise-Paarl (27ha) Malmesbury (16ha) kanye ne-Stellenbosch (11ha).

Ukukhula Kwawo

I-Roussanne itlhoga ubujamo obomileko bomtjhiso welanga ukuze avuthwe ngokwaneleko begodu isivinesi asitheli ngokwaneleko, inani lomkhiqizo kungaba yi-(6-8 ton/ha) nangaphasi kobujamo bokumila obuhle. Kumhlobo wesimilo odinga izandla khulu ukuze ukhule. E-California kwatholakala bonyana amaderibe la akakghoni ukujamelana nelanga begodu amakari asuswa ngesandla ukwenzela bonyana amaderibe afumana ilanga elaneleko nekusiza ukuthuthuka nokuvuthwa kwawo.

Umhlobo we-Roussanne’ ukuvuthwa kwawo kutjho bonyana kufuze uvunwe amahlandla ambalwa. – ukuwakha ngesandla ngikho okuncono. Umhlobo lo uvame ukuvuthwa sele usezingeni eliphezulu lesidaki. Kunjalo nje kuqakathekile ukulawula isidaki emimumethwe yiwayini.

Ukuvuthwa

I-Roussanne ilungela ukukhiwa nofana ukuvunwa ekuthomeni kwesikhathi sonyaka – ngemuvanyana kwe-Sauvignon Blanc.

Amamomori

Amamomori mancani begodu arondo anombala osarulana okuvangeke ngozotho nakavuthiweko.

Amakari

Amakari wona anesilinganiso sobukhulu esiphakathi, aneencenye ezihlanu zesiphetho ezineempenda begodu anamamevana arondo.

Iintjhabalalisi kanye Namalwelwe

I-Roussanne ayizwani nokonakala okubizwa nge-powdery mildew begodu uvame ukukoniwa mumoya novamise ukukhinyabeza umkhiqizo.

Umsebenzawo

Esewula Afrika utholakala njengomhlobo ongakavangwa wewayini, kodwana abiza imali ephezulu. Uhlanganiswe ne-Marsanne kanye ne-Viognier ukwenza umvango omhlophe onephungana elimnandi kanye nesipayisi, begodu unothile.

Awuzwani ne-oxidation. Ukuvangwa kwe-Roussanne’s okunothileko, kwamaminerali kanye ne-esede, kuyangezelela ekuluphaleni kwawo – ukuya nangaphezu kweminyaka elisumi. Iwayini le izuza khulu ekusokweni nofana ekubibhweni – lokhu kungaba ngokubibha nofana ukuyiluphaza nge-oak.

Inambitho

Amawayini enziwe ngamaderibe we-Roussanne aziwa ngokuba nomnuko omnandi. Nakavunwe ngaphambi kwesikhathi asezingeni leswigiri ephasi, amawayini asazoba mahle bekasale avuthwa ukuya phambili, aba nezinga elihle le-esede.

I-Roussanne akusiwo umhlobo onothileko. Uthandelwa khulu ukuba namakelo anambitha njengamafutha kanye nokuba nemikghwa ye-pepper esikhathini esinengi. Kesinye isikhathi angaba yi-tropical, akhombise amatshwayo wepenabhula kanye nomnuko wethuthumbo lomango nofana i-lilly.

Translated by Johannes Nkosinathi