Iintenetjha – Zobukhulu Obuphakathi Ukufuyela Iminqopho emibili

© Judy Stuart

Nawufuye iintenetjha kuqakatheke khulu bonyana uhlale uzumana namathuba wokukhangisa. Nanyana kujayelekile bonyana nawufuyele ukurhweba okukhulu pheze kujayelekile ukusebenzisa imihlobo emikhulu efana ne-New Zealand Whites ne-Californians, kanengi kuba nenzuzo ephezulu ukufuna ukufuya zobukhulu obuphakathi noweminqopho emibili nangabe umuntu ufuya imbijana.
Ukuragela phambili ngepumelelo kokufuya kudinga kancani khulu ukuthenga ukudla, njengomba aiintenetjha zivamise ukuphiwa utjani nokuhlaza ukusuka emirorhweni namakhambi wangeentoni, zikhula buthaka khulu ukudlula lezo eziphiwa ukudla ukwenzela ukurhweba. Lokhu kuzipha isikhathi esaneleko sokuthi zikhule ngokwaneleko bezibe namaboya alungileko ngaphambi kobanyana zingahlatjwa.
Ubuya bentenetjha esele ikhule ngokwaneleko bupha izinga eliphezulu; kunjalo nje lokho kupha intengo ephezulu lokha nayithengiswako nofana busetjenziselwa umkhiqizo wokuthengiswa.

Ezilungele Ukufuyelwa Iminqopho emibili

Silver Fox

©Judy Stuart
I-Silver foxes zimhlobo olunge khulu eSewula Afrika begodu unesikhumba soboya obuhle obunzima emahlangothi budege begodu buneenhlutjhwa esirhanyazelako ezide. Zikhulisa kuhle khulu begodu zibazali abaphuma phambili. Ukuba nesikhumba esinzima kwazo kutjho bonyana akukafaneli zihlale elangeni, njengombana lokho kungatjhugulula umbala woboya bugcine sele buthunyile begodu lokho kona isikhumba soke.

Beige

©Judy Stuart
I-Beige mhlobo ofuyeka lula khulu onesikhumba esinamaboya amanengi apakeleneko begodu buyarhanyazela nawubucalileko. Zinombala othunyileko kuthi encenyeni ephezulu bube nokuhlaza.

Rex

©Judy Stuart
I-Rexes ziba nemibala eminengi ehlukileko begodu zimhlobo onoboya obuphuma phambili ukudlula yoke imihlobo yeentenetjha. Zidinga iindlwana ezikhethekileko ngebanga lesikhumba sazo ezithambileko, zinomukghwa wokuvuvuka iinyawo, nje-ke zidinga iindawo zokulala ezilungileko namakheji ahlanzekileko ngaso soke isikhathi.
Okwenza bonyana i-Rexes ihluke kuneminye imihlobo yeentenetjha sikhumba sayo. Yoke imihlobo ineenhluthu ezimihlobo emibili eyenza isikhumba. Kiyo yoke imihlobo incenye ephezulu inemaboya anqophileko phezulu begodu lawo wangaphasi mafitjhazana begodu ayatjhelela ngaphasi kwencenye yesikhumba esiphezulu. Emhlobeni we-Rexes incenye engaphasi yesikhumba inamaboya amade ukudlula lawo angaphezulu begodu isikhumbesi sinothile sinjalo nje sifanele ukubiza imali ephezulu yeemkhiqizo ye-velvet.
Kungaba kuhle ukuthi uthome ngokuthola ilemuko lokufuya iintenetjha ngaphambi kobanyana ufuye umhlobo omuhle kodwana ofuyeka nzima lo.

Satin

©Judy Stuart
Imihlobo ye-Satin rabbits, nayo iba mihlobohlo yemibala begodu inesikhumba esirhanyazela khudlwana. Lokhu kungombana isakhiwo sananyana ngibuphi uboya nesihlukileko kunanyana ngimiphi imihlobo. Amayoyayo akheke njenge-triangular begodu akhombisa umkhanyo ngokuhlukileko. Zilula khulu ukuzilawula begodu ziba bazali abahle khulu.

Angora Rabbits

©Judy Stuart
Umhlobo we-Angora rabbits zimhlobo okhetheke khulu. Azikhuliselwa inyama kodwana zikhuliselwa umkhiqizo wewula. Azihlatjelwa ukuthola iwula kodwana ziyagudwa njengezimvu amahlandla amane ngonyaka. Iwula le inganquthulwa nofana ihlutjwe ngokuyelela entenetjheni nangabe sele ikhule ngokwaneleko.
I-Angoras ziba nemibala eminengi kodwana zidinga umsebenzi omnengi; zidinga bonyana zikanywe bezihlengwe kanengi ukwenzela ukuvikela bonyana iwulazo ingararani begodu kufuze zibekwe ngaphakathi kwamakheji weendrada ngaphezu kwephasi. Kulula ukuzikhulisa bedodu isilwani esinganamkhiqizo omuhle zingahlatjwa bese ziba kukudla kwesakhiwo esihle.
I-Angora zinewula elula ukuyitatela ngesandla beyibe msidlana omuhle ongasetjenziselwa ukuhlanganisa izinto nokubopha, nofana ukuthunga.
Kuyadingeka bonyana uziphe isikhathi esaneleko ekutateleni kwevilo begodu nokuthola iimfundo zakhona kodwana nasele ulifundile iqhingeli lizakupha ikghono elihle khulu emfuyini.

Translated by Johannes Nkosinathi