Avuthwa nini amaDiriyibe Wokwenza iWayini?

© Louise Brodie
Ukubona bona amadiriyibe wewayini avuthiwe, kwenziwa ngokobana kuthathwe idiriyibe linye kanye nehlanganisela yamadiriyibe kuhlolwe ukuze kubonwe amatjhwayo alandelako: Izinga leswigiri I-Acidity Umbala Ukunambitheka I-pH Lokha idiriyibe ngalinye namtjhana ihlanganisela yawo ithathwa namtjhana athathwa ayokuhlolwa, kufanele kutlhogonyelwe bona akathathwa ndawoyinye kwaphela esimini yamadireyibe ngombana indawo leyo yinye azabe athathwe kiyo ayitjho bona isimu yoke yamadiriyibe inamadiriyibe anjalo. Njeke thatha emalungeni ahlukahlukeneko wesimu ngaphandle nangaphakathi kwamareyi, uthathe namadiriyibe atjalwe emthunzini nalayo atjalwe elangeni.
Ukuhlolwa ngokukha ihlanganisela yamadiriyibe kujwayelekile okwenziwa ngemva kokobana ihlanganisela yamadiriyibe sele ithoma ukuba nombala, nalokha idiriyibe sele lithoma ukuba matofotofo, nokwenzeka ngemva kweveke naqobe ngemva kwamalanga amabili kuze kufike isikhathi sokuwavuna. Amasampuli asiwa e- laboratory. Lapha afika apitjizwe, ahlanganiswe kuthi amazinga weswigiri, i-pH kanye ne-asidi amedwe, arikhodwe kutlolwe nelanga okwenziwe ngalo lokho,isimu yediriyibe kanye nenomboro ye-blogo yalapha athathwe khona ye-diriyibe ngalinye ngalinye. Ngalokho bakghona ukubona lokha aragela phambili ngokuvuthwa, nokobana azokuvunwa nini ngokuya ngemiphumela yokuhlolwokho.

Uyenza njani Isampula Yediriyibe Ngalinye

Kuthathwa amadiriyibe amabili, nanyana amathathu akhiwe ngaphasi, phakathi naphezulu ehlanganiseleni yamadiriyibe, ngaphandle kokukhetha amadiriyibe athize nanyana ngaphandle kokuwaqala. Kuqakathekile ukukha amadiriyibe ngaphakathi, nangaphandle kwesivini nemahlangothini womabili wamareyi. Ngendlela le, isampuli izokujamela kuhle isimu yoke yamadiriyibe.

Uyenza njani Isampuli Yehlanganisela Yamadiriyibe

Yikha ihlanganisela yamadiriyibe ngaphakathi, nangaphandle kwesivini, ukusuka phezulu ukuya phasi esivinini, nemahlangothini womabili wemareyini. Njengobana wenzile ediriyibeni ngalinye, ungakhethi ihlanganisela, hlanganisa zoke iinhlanganisela zamadiriyibe ethungeni, uragele phambili uthathe yoke isampuli yamalunga woke wesimu yamadiriyibe uze uyiqede.

Translated by Busisiwe Skhosana